امریکی صدر کا کینیڈا کے ساتھ تجارتی برابری نہ ہونے پر سخت ردعمل

امریکی صدر ڈونلڈ ٹرمپ نے کینیڈا کے ساتھ تجارتی برابری نہ ہونے پر سخت ردعمل کا اظہار کرتے ہوئے کینیڈین حکومت اور صوبوں پر امریکی کسانوں اور کمپنیوں کو سرکاری خریداری کی منڈیوں تک مساوی رسائی نہ دینے کا الزام عائد کیا ہے۔

ڈونلڈ ٹرمپ نے اپنے سوشل میڈیا پلیٹ فارم ’ٹروتھ سوشل‘ پر جاری بیان میں کہا کہ کینیڈین حکومت اور صوبے امریکی چھوٹے کسانوں اور کمپنیوں کو سرکاری خریداری کی منڈیوں تک رسائی نہیں دیتے، جبکہ کینیڈا کو امریکی سرکاری خریداری کی وسیع منڈی تک رسائی حاصل ہے۔

امریکی صدر نے اس صورتحال کو کینیڈین تجارتی اسکیم قرار دیتے ہوئے امریکی جنرل سروسز ایڈمنسٹریشن کو ہدایت کی ہے کہ کینیڈین مصنوعات کو ملٹی پل ایوارڈ شیڈولز سے ہٹانے کے لیے ضروری اقدامات کیے جائیں۔

صدر ٹرمپ کا کہنا ہے کہ کینیڈین مصنوعات کو اس وقت تک ان شیڈولز سے ہٹایا جائے جب تک امریکی کسانوں اور کمپنیوں کے لیے مکمل اور منصفانہ تجارتی برابری بحال نہیں ہوجاتی۔