وزیر خزانہ محمد اورنگزیب کی امریکی وزیر خزانہ سکاٹ بیسنٹ سے اہم ملاقات

(واشنگٹن) وفاقی وزیرِ خزانہ و محصولات سینیٹر محمد اورنگزیب نے اپنے امریکی ہم منصب سکاٹ بیسنٹ سے اہم ملاقات کی، جس میں پاک۔امریکا اقتصادی تعلقات، سرمایہ کاری، مالیاتی تعاون اور پاکستان کی معاشی صورتحال پر تفصیلی تبادلہ خیال کیا گیا۔

ملاقات کے دوران وزیر خزانہ محمد اورنگزیب نے امریکی وزیر خزانہ کو پاکستان کی معیشت میں حالیہ بہتری، میکرواکنامک استحکام اور پائیدار، برآمدات پر مبنی اقتصادی ترقی کے لیے حکومت کی حکمت عملی سے آگاہ کیا۔ انہوں نے بتایا کہ حکومت معاشی اصلاحات، مالیاتی نظم و ضبط اور نجی شعبے کی قیادت میں ترقی کے ایجنڈے پر عمل پیرا ہے

وزیر خزانہ نے خطے میں جاری کشیدہ صورتحال کے پاکستان کی معیشت، تجارت اور سرمایہ کاری پر پڑنے والے منفی اثرات کا بھی ذکر کیا اور کہا کہ غیر یقینی علاقائی ماحول کے باوجود حکومت معاشی استحکام برقرار رکھنے اور سرمایہ کاروں کے اعتماد میں اضافے کے لیے اقدامات کر رہی ہے۔

محمد اورنگزیب نے امریکی تعاون کی ضرورت پر زور دیتے ہوئے کہا کہ پاکستان بین الاقوامی کیپٹل مارکیٹوں تک بہتر رسائی، زرمبادلہ کے ذخائر میں مزید بہتری اور خودمختار کریڈٹ ریٹنگ میں اضافے کے ذریعے عالمی مالیاتی منڈیوں میں اپنی پوزیشن مستحکم کرنا چاہتا ہے، جس میں امریکا کا تعاون انتہائی اہم ہو سکتا ہے۔

ملاقات میں دونوں وزرائے خزانہ نے پاک۔امریکا اقتصادی شراکت داری کو مزید مضبوط بنانے، امریکی سرمایہ کاری میں اضافے، نجی شعبے کے روابط کو فروغ دینے اور دونوں ممالک کے درمیان جاری تذویراتی و ترقیاتی منصوبوں پر تیز رفتار پیش رفت کو یقینی بنانے کے عزم کا اعادہ کیا۔ دونوں فریقوں نے اقتصادی تعاون کو نئی جہت دینے اور باہمی مفادات پر مبنی شراکت داری کو مزید وسعت دینے پر بھی اتفاق کیا۔