سینٹرم ایئر کا پاکستان کیلئے فضائی آپریشن شروع، تاشقند سے پہلی پرواز کراچی پہنچ گئی
ازبکستان کی سینٹرم ایئر نے کراچی اور تاشقند کے درمیان فضائی آپریشن شروع کردیا۔ ہفتہ وار دو پروازیں چلائی جائیں گی، پہلی پرواز کی کراچی آمد پر واٹر سیلوٹ پیش کیا گیا
کراچی: ازبکستان کی ایئرلائن سینٹرم ایئر نے پاکستان کے لیے فضائی آپریشن کا آغاز کردیا، جس کے تحت تاشقند سے پہلی پرواز کراچی پہنچ گئی۔
پہلی پرواز جمعرات کی علی الصبح کراچی ایئرپورٹ پہنچی، جہاں پاکستان ایئرپورٹس اتھارٹی کی جانب سے طیارے کو روایتی واٹر سیلوٹ پیش کیا گیا۔
ہفتہ وار دو پروازیں چلانے کا اعلان
سینٹرم ایئر کے مطابق کراچی اور تاشقند کے درمیان ہفتہ وار دو پروازیں آپریٹ کی جائیں گی۔ پہلی پرواز کے رن وے پر ٹچ ڈاؤن کے بعد طیارے کو واٹر سیلوٹ دیا گیا۔
پرواز کی آمد کے موقع پر سفارتی اور مقامی حکام نے طیارے کا استقبال کیا۔ تقریب میں پاکستان میں آذربائیجان کے سفیر علی شیر تختائیف، ایئرلائن کے ہیڈ آف ایجنٹس عادل مرزا، جیریز دناٹا گروپ کے ڈائریکٹر ارشد ولی محمد اور دیگر حکام نے شرکت کی۔
آذربائیجان کے سفیر نے فضائی عملے کو پھول پیش کیے، جبکہ دیگر حکام کے ہمراہ کیک بھی کاٹا گیا۔
کراچی سے تاشقند کیلئے 96 مسافر روانہ
کراچی ایئرپورٹ سے تاشقند روانہ ہونے والی واپسی کی پرواز میں 96 مسافر سوار ہوئے۔
سینٹرم ایئر کے فضائی آپریشن کے آغاز سے پاکستان اور ازبکستان کے درمیان براہ راست فضائی رابطے میں مزید بہتری آنے کی توقع ہے، جبکہ مسافروں کے لیے دونوں ممالک کے درمیان سفر مزید آسان ہوگا۔
شائع ہوا: 4 ستمبر، 2026 کو 04:54 AM
آخری تدوین: 4 ستمبر، 2026
