فرانس میں پُرتشدد احتجاج، کئی شہروں میں کرفیو نافذ، 2400 افراد گرفتار، ایک ہزار پولیس اہلکار زخمی

فرانس میں بڑھتے ہوئے پُرتشدد احتجاج پر قابو پانے کے لیے کئی شہروں میں کرفیو نافذ اور نقل و حرکت پر پابندیاں عائد کردی گئیں، جبکہ احتجاج کے دوران 2400 افراد کو گرفتار کیے جانے کی اطلاعات ہیں۔

غیر ملکی میڈیا کے مطابق فرانس میں مہنگائی، بے روزگاری اور تعلیمی سہولتوں کی کمی کے خلاف کئی روز سے احتجاج جاری ہے۔ مظاہروں کے دوران توڑ پھوڑ اور جلاؤ گھیراؤ کے واقعات بھی پیش آئے، جن کے نتیجے میں ایک ہزار پولیس اہلکار زخمی ہوگئے۔

رپورٹس کے مطابق صورت حال پر قابو پانے کے لیے دارالحکومت پیرس سمیت لیون، نیس اور شمالی فرانس کے مختلف علاقوں میں نقل و حرکت محدود کردی گئی ہے، جبکہ متعدد مقامات پر کرفیو بھی نافذ کیا گیا ہے۔

حکام کی جانب سے امن و امان برقرار رکھنے کے لیے اقدامات کیے جارہے ہیں، تاہم احتجاج کے دوران گرفتاریوں اور پولیس اہلکاروں کے زخمی ہونے کے واقعات نے صورت حال کی سنگینی کو نمایاں کردیا ہے۔