بحرین میں ایران سے مبینہ روابط پر متعدد افراد گرفتار، جاسوسی کے الزامات عائد

(منامہ)بحرین کی وزارت داخلہ نے دعویٰ کیا ہے کہ ملک میں ایران کے پاسدارانِ انقلاب سے مبینہ قریبی تعلق رکھنے والے متعدد افراد کو گرفتار کیا گیا ہے، جن میں بعض پر جاسوسی کے الزامات بھی عائد کیے گئے ہیں۔

بحرینی وزارت داخلہ کی جانب سے جاری بیان میں گرفتار افراد کی تعداد ظاہر نہیں کی گئی، تاہم حکام کا کہنا ہے کہ کارروائیاں قومی سلامتی کے تحفظ کے لیے کی گئیں۔

بیان کے مطابق گرفتار افراد پر ایران سے ہمدردی رکھنے، ایران کے حملوں کی حمایت کرنے اور غیر ملکی عناصر کے ساتھ تعاون کے الزامات ہیں۔

یہ پیش رفت ایسے وقت میں سامنے آئی ہے جب بحرین نے اپریل کے آخر میں 69 افراد کی شہریت منسوخ کرنے کا اعلان کیا تھا۔ بحرینی حکام نے اُس وقت بھی ان افراد پر ملکی سلامتی کے خلاف سرگرمیوں اور بیرونی روابط میں ملوث ہونے کے الزامات عائد کیے تھے۔