ہم مضبوط پوزیشن میں ہیں، جنگ ختم کرنے کا وقت آ گیا: ایرانی صدر

ایرانی صدر مسعود پزشکیان نے کہا ہے کہ ایران دباؤ اور دھونس کے سامنے کسی صورت نہیں جھکے گا، تاہم اب جنگ ختم کرنے کا وقت آ گیا ہے کیونکہ ایران مضبوط پوزیشن میں ہے۔

مسعود پزشکیان کا کہنا تھا کہ ایران دشمن کے سامنے آخری سانس تک مزاحمت جاری رکھنے کے لیے پرعزم ہے اور کسی بھی دباؤ کو قبول نہیں کرے گا۔ انہوں نے کہا کہ دشمن کو فیصلہ کن جواب دیا جائے گا، تاہم جنگ کسی نہ کسی مرحلے پر ختم ہونی ہے۔

ایرانی صدر نے کہا کہ بہتر ہوگا جنگ آج ہی ختم کردی جائے، کیونکہ ایران اپنی طاقت ثابت کرچکا ہے۔ ان کے مطابق جنگ کے نتیجے میں پیدا ہونے والی مہنگائی اور دیگر معاشی مسائل کے لیے ملک کو تیار رہنا ہوگا۔

مسعود پزشکیان نے واضح کیا کہ ایران اس وقت مضبوط پوزیشن میں ہے، اس لیے جنگ کے خاتمے کا وقت آچکا ہے۔

دوسری جانب ایرانی پارلیمنٹ کے اسپیکر باقر قالیباف نے کہا ہے کہ تہران کو امریکا کی پابندیوں سے نمٹنے کے لیے مؤثر منصوبہ بندی کرنا ہوگی۔

باقر قالیباف کا کہنا تھا کہ ایران کے دشمن مسلم ممالک کے وسائل اور خام مال پر قبضہ کرنے کے لیے آگے بڑھ رہے ہیں۔ انہوں نے کہا کہ ایران اور عراق کسی کو اپنی تقدیر کا فیصلہ کرنے کی اجازت نہیں دیں گے۔