ایران کا امریکا کو سخت انتباہ، جارحیت دہرائی گئی تو پہلے سے زیادہ حیران کن جواب دیں گے

ایران نے امریکا کو سخت پیغام دیتے ہوئے خبردار کیا ہے کہ اگر دوبارہ جارحیت کی گئی تو تہران پہلے سے زیادہ طاقتور اور حیران کن ردعمل دے گا۔

ایرانی وزیر خارجہ عباس عراقچی نے سوشل میڈیا پر جاری اپنے بیان میں کہا کہ ایران کے خلاف جنگ شروع کیے جانے کے کئی ماہ بعد امریکی کانگریس نے بھی اس حقیقت کا اعتراف کیا ہے کہ لڑائی کے دوران اربوں ڈالر مالیت کے متعدد لڑاکا طیارے تباہ ہوئے۔

انہوں نے دعویٰ کیا کہ امریکی حکام کی جانب سے اس بات کی بھی تصدیق کی گئی ہے کہ ایرانی فوج دنیا کے جدید ترین جنگی طیاروں میں شمار ہونے والےایف تھرٹی فائیو طیارہ کو مار گرانے والی پہلی قوت بنی۔

عباس عراقچی کا کہنا تھا کہ ایران نے جنگ کے دوران بہت کچھ سیکھا ہے اور اگر کسی بھی قسم کی نئی جارحیت کی گئی تو انہی تجربات اور حکمت عملی کی بنیاد پر پہلے سے زیادہ سخت اور حیران کن جواب دیا جائے گا۔

ایرانی وزیر خارجہ کے اس بیان کو خطے میں بڑھتی ہوئی کشیدگی کے تناظر میں اہم قرار دیا جا رہا ہے، جبکہ ایران اور امریکا کے درمیان تعلقات ایک بار پھر تناؤ کا شکار دکھائی دے رہے ہیں۔