پاکستان کی مصالحتی کوششیں ناکام نہیں ہوئیں، بھارت ہمارے ساتھ تعلقات کا فیصلہ کرے: عباس عراقچی

(نئی دہلی ) ایران کے وزیر خارجہ عباس عراقچی نے کہا ہے کہ پاکستان کی جانب سے جاری مصالحتی اور سفارتی کوششیں ابھی ناکام نہیں ہوئیں جبکہ بھارت کو فیصلہ کرنا ہوگا کہ وہ ایران کے ساتھ کس نوعیت کے تعلقات رکھنا چاہتا ہے۔

نئی دہلی میں پریس کانفرنس کرتے ہوئے عباس عراقچی نے کہا کہ کچھ طاقتیں سفارتی عمل کو ناکام بنانے کی کوشش کر رہی ہیں تاہم پاکستان کا امن مشن تاحال جاری ہے۔ انہوں نے کہا کہ ایران جنگ بندی برقرار رکھنے کی کوشش کر رہا ہے اور مذاکرات اسی صورت ممکن ہیں جب دوسرا فریق سنجیدگی کا مظاہرہ کرے۔

ایرانی وزیر خارجہ نے کہا کہ آبنائے ہرمز میں صورتحال انتہائی کشیدہ ہے لیکن ایران دوست ممالک کے جہازوں کیلئے راستہ کھلا رکھے گا۔ ان کے مطابق ایران کے دشمن ممالک کے علاوہ تمام بحری جہاز آبنائے ہرمز سے گزر سکتے ہیں تاہم انہیں ایرانی بحریہ کے ساتھ تعاون اور رابطہ رکھنا ہوگا۔

عباس عراقچی نے کہا کہ امریکہ کی جانب سے متضاد پیغامات موصول ہو رہے ہیں جس کے باعث مذاکرات کے حوالے سے واشنگٹن کے حقیقی ارادوں کو سمجھنا مشکل ہو رہا ہے۔ انہوں نے الزام عائد کیا کہ امریکہ نے مذاکرات کے دوران ایران پر حملے کیے اور 2015 کے جوہری معاہدے کو بلاجواز ختم کیا۔

انہوں نے کہا کہ ایران کا جوہری پروگرام پرامن ہے اور رہے گا، ایران ہتھیار بنانے کا ارادہ نہیں رکھتا، تاہم امریکی پابندیوں اور دباؤ کے باوجود ایران اپنے مؤقف پر قائم ہے۔

ایرانی وزیر خارجہ نے مزید کہا کہ اگر امریکہ سنجیدہ اور منصفانہ معاہدے کیلئے تیار ہوا تو ایران بھی مذاکرات آگے بڑھانے کیلئے تیار ہے، تاہم اگر حالات خراب ہوئے تو ایران ہر ممکن جواب دینے کی صلاحیت رکھتا ہے۔

عباس عراقچی نے برکس وزرائے خارجہ اجلاس سے خطاب کرتے ہوئے سلامتی کونسل کے نظام پر بھی تنقید کی اور کہا کہ موجودہ عالمی نظام عدم مساوات کی علامت بن چکا ہے اور اس میں فوری اصلاحات کی ضرورت ہے۔