پاکستان اور کینیڈا میں تجارت و سرمایہ کاری بڑھانے پر اتفاق، زراعت، معدنیات اور ٹیکنالوجی میں تعاون پر غور

پاکستان اور کینیڈا نے دوطرفہ تجارت، سرمایہ کاری اور مختلف شعبوں میں تعاون بڑھانے کے امکانات پر تبادلہ خیال کیا ہے، جس میں زراعت، معدنیات، ٹیکنالوجی اور غذائی تحفظ کو خصوصی اہمیت دی گئی۔

یہ بات چیت وفاقی وزیر خزانہ و محصولات سینیٹر محمد اورنگزیب اور کینیڈا کے سیکریٹری آف اسٹیٹ برائے بین الاقوامی ترقی رندیپ سرائے کے درمیان تھائی لینڈ کے شہر بینکاک میں عالمی بینک گروپ اور بین الاقوامی مالیاتی فنڈ (آئی ایم ایف) کے سالانہ اجلاسوں 2026 کے موقع پر ہونے والی ملاقات میں ہوئی۔

کینیڈین سرمایہ کاری بڑھانے پر زور

ملاقات کے دوران وزیر خزانہ محمد اورنگزیب نے پاکستان کی معاشی استحکام کے لیے جاری کوششوں کو اجاگر کیا اور کینیڈا کی جانب سے پاکستان میں سرمایہ کاری بڑھانے کے لیے سرمایہ کاری کے تحفظ کے معاہدے پر پیش رفت کی ضرورت پر زور دیا۔

دونوں فریقوں نے زراعت، جدید زرعی ٹیکنالوجی، لائیو اسٹاک اور غذائی تحفظ کے شعبوں میں تعاون کے مواقع کا جائزہ لیا۔ اس موقع پر اقتصادی تعلقات کو مزید مستحکم بنانے کے لیے نجی شعبے کی شمولیت کی اہمیت پر بھی زور دیا گیا۔

بیرک مائننگ منصوبہ بھی زیرِ بحث

ملاقات میں بیرک مائننگ منصوبے سے متعلق امور پر بھی تبادلہ خیال کیا گیا، جن میں سکیورٹی کا جائزہ، مالیاتی انتظامات اور منصوبے کے ذریعے برآمدات میں اضافے اور روزگار کے مواقع پیدا کرنے کے امکانات شامل تھے۔

فریقین نے اس منصوبے کو اقتصادی سرگرمیوں میں اضافے اور پاکستان کی برآمدی صلاحیت کو بہتر بنانے کے حوالے سے بھی زیرِ غور لایا۔

آئی ٹی اور مصنوعی ذہانت میں تعاون کے امکانات

وزیر خزانہ نے انفارمیشن ٹیکنالوجی (آئی ٹی) خدمات، مصنوعی ذہانت (اے آئی) کی مہارتوں اور ورچوئل اثاثوں کے شعبوں میں تعاون کے مزید امکانات کی نشاندہی کی۔

انہوں نے پاکستان اور کینیڈا کے اقتصادی تعلقات کو مضبوط بنانے میں پاکستانی تارکین وطن کے کردار کو بھی اجاگر کیا، خصوصاً کینیڈا سے پاکستان بھیجی جانے والی ترسیلاتِ زر کی اہمیت پر روشنی ڈالی۔

علاقائی تنازعات اور غذائی تحفظ پر تبادلہ خیال

ملاقات کے دوران پاکستان کی ثالثی کی کوششوں اور علاقائی تنازعات کے عالمی توانائی کی منڈیوں، کھاد کی فراہمی اور غذائی تحفظ پر مرتب ہونے والے اثرات کے حوالے سے بھی تبادلہ خیال کیا گیا۔

محمد اورنگزیب نے پاکستان میں سیلاب کے بعد امداد فراہم کرنے پر کینیڈا کا شکریہ ادا کیا۔ انہوں نے سیاحت کو بھی دونوں ممالک کے درمیان تعاون کے ممکنہ شعبے کے طور پر پیش کیا اور رندیپ سرائے کو پاکستان کے دورے کی دعوت دی۔

ملاقات میں دونوں ممالک کے درمیان اقتصادی روابط کو وسعت دینے، سرمایہ کاری کے مواقع تلاش کرنے اور مختلف شعبوں میں تعاون کو فروغ دینے کے عزم کا اظہار کیا گیا۔