عالمی منڈی میں خام تیل کی قیمتیں کم ہونا شروع، پاکستان میں بھی ریلیف کی امید: وزیر پیٹرولیم

اسلام آباد: وفاقی وزیر پیٹرولیم علی پرویز ملک نے کہا ہے کہ عالمی منڈی میں خام تیل، پیٹرول اور ڈیزل کی قیمتیں کمی کی جانب گامزن ہیں، جس کے باعث آئندہ دنوں میں قیمتوں میں استحکام اور ممکنہ کمی کی توقع پیدا ہو گئی ہے۔

وزیر پیٹرولیم نے اپنے بیان میں کہا کہ سب سے اہم خبر یہ ہے کہ باب المندب میں پھنسے ہوئے جہاز اپنی منزل کی جانب روانہ ہو چکے ہیں، جس سے سپلائی چین کی صورتحال بہتر ہونے کی توقع ہے۔ ان کے مطابق گزشتہ چند روز سے عالمی منڈی میں قیمتوں میں جو اضافہ دیکھا جا رہا تھا، اب اس میں کمی کا رجحان شروع ہو چکا ہے۔

انہوں نے واضح کیا کہ پاکستان میں پیٹرولیم مصنوعات کی قیمتوں کا حتمی تعین آئل اینڈ گیس ریگولیٹری اتھارٹی (اوگرا) اپنے مقررہ فارمولے کے تحت کرے گی، لہٰذا قیمتوں میں کمی یا اضافے کا فیصلہ اوگرا کی سفارشات کے مطابق ہوگا۔

علی پرویز ملک نے مزید بتایا کہ آئل ٹینکرز مالکان کو درپیش مسائل کے حل کے لیے ایک خصوصی کمیٹی تشکیل دے دی گئی ہے، جو ٹینکرز کے کرایوں، کوٹہ سسٹم اور دیگر انتظامی معاملات کا جائزہ لے کر سفارشات پیش کرے گی۔

دوسری جانب ایران اور امریکا کے درمیان کشیدگی میں کمی کے بعد عالمی منڈی میں خام تیل کی قیمتوں میں نمایاں کمی ریکارڈ کی گئی ہے۔

تازہ اعداد و شمار کے مطابق برینٹ کروڈ آئل کی قیمت میں 9.26 فیصد کمی کے بعد یہ 87.82 ڈالر فی بیرل پر آ گئی، جبکہ ویسٹ ٹیکساس انٹرمیڈیٹ (WTI) خام تیل 7.64 فیصد سستا ہو کر 82.49 ڈالر فی بیرل تک پہنچ گیا۔

ماہرین کے مطابق اگر عالمی منڈی میں خام تیل کی قیمتوں میں کمی کا رجحان برقرار رہا تو پاکستان میں آئندہ پیٹرولیم مصنوعات کی قیمتوں میں بھی عوام کو ریلیف ملنے کے امکانات بڑھ سکتے ہیں۔