فٹبال ورلڈ کپ: ارجنٹینا نے سوئٹزرلینڈ کو شکست دے کر سیمی فائنل میں جگہ بنا لی

فٹبال ورلڈ کپ کے آخری کوارٹر فائنل میں دفاعی چیمپئن ارجنٹینا نے سنسنی خیز مقابلے کے بعد سوئٹزرلینڈ کو 3-1 سے شکست دے کر سیمی فائنل کے لیے کوالیفائی کر لیا، جہاں اس کا مقابلہ انگلینڈ سے ہوگا۔

میچ کا آغاز ارجنٹینا کے جارحانہ کھیل سے ہوا اور ٹیم نے 10ویں منٹ میں میک الیسٹر کے گول کی بدولت برتری حاصل کر لی۔ تاہم سوئٹزرلینڈ نے 67ویں منٹ میں ڈوئے کے گول کے ذریعے مقابلہ 1-1 سے برابر کر دیا۔

مقررہ 90 منٹ تک دونوں ٹیمیں ایک، ایک گول کے ساتھ برابر رہیں، جس کے بعد فاتح کے تعین کے لیے اضافی وقت دیا گیا۔

اضافی وقت کے دوسرے ہاف میں ارجنٹینا نے ایک بار پھر برتری حاصل کی، جب الواریز نے شاندار گول کر کے اپنی ٹیم کو 2-1 سے آگے کر دیا۔ کھیل کے آخری لمحات میں ارجنٹینا نے تیسرا گول بھی اسکور کیا، جس کے بعد مقابلہ 3-1 پر ختم ہوا اور ارجنٹینا نے سیمی فائنل میں جگہ بنا لی۔

میچ کے دوران ایک اہم واقعہ اس وقت پیش آیا جب ریفری نے سوئٹزرلینڈ کے کھلاڑی ایمبولو کو ریڈ کارڈ دکھا کر میدان سے باہر بھیج دیا۔ ایمبولو نے دعویٰ کیا تھا کہ انہیں ارجنٹینا کے کھلاڑی نے فاؤل کیا، تاہم وی اے آر کے ذریعے جائزہ لینے کے بعد ریفری اس نتیجے پر پہنچے کہ کھلاڑی نے گرنے کی اداکاری کی، جس پر انہیں ریڈ کارڈ دکھایا گیا۔

ارجنٹینا کی فتح کے بعد اب شائقین کی نظریں سیمی فائنل پر مرکوز ہیں، جہاں دفاعی چیمپئن کا مقابلہ انگلینڈ سے ہوگا۔ دونوں مضبوط ٹیموں کے درمیان متوقع مقابلہ ٹورنامنٹ کے دلچسپ ترین میچز میں شمار کیا جا رہا ہے۔