آزاد کشمیر میں بھارتی فنڈنگ سے افراتفری پھیلانے کی کوشش ناکام، کالعدم جوائنٹ ایکشن کمیٹی کے خلاف شواہد موجود ہیں: عطاء تارڑ

اسلام آباد: وفاقی وزیر اطلاعات و نشریات عطاء تارڑ نے کہا ہے کہ حکومت پہلے دن سے مؤقف اختیار کیے ہوئے ہے کہ کالعدم جوائنٹ ایکشن کمیٹی کشمیر کاز کو نقصان پہنچا رہی ہے، جبکہ اب آزاد کشمیر میں بھارتی فنڈنگ سے افراتفری پھیلانے کی کوششوں کے شواہد سامنے آ چکے ہیں۔

اسلام آباد میں پریس کانفرنس سے خطاب کرتے ہوئے عطاء تارڑ نے کہا کہ آزاد کشمیر میں امن و امان کی صورتحال خراب کرنے اور عوام کو ریاستی اداروں کے خلاف اکسانے کی منظم کوشش کی گئی، تاہم قانون نافذ کرنے والے اداروں نے بروقت کارروائی کرتے ہوئے اس منصوبے کو ناکام بنا دیا۔

انہوں نے دعویٰ کیا کہ کالعدم جوائنٹ ایکشن کمیٹی کا انتخابی عمل میں حصہ نہ لینا اس کی بھارت نواز سوچ کا ثبوت ہے، جبکہ مختلف علاقوں میں پوسٹرز، سوشل میڈیا مہم اور منظم پروپیگنڈے کے ذریعے عوام کو گمراہ کرنے کی کوشش کی گئی۔

وفاقی وزیر اطلاعات کے مطابق بھارتی خفیہ ایجنسی "را" سے منسلک سوشل میڈیا نیٹ ورک پاکستان مخالف مہم میں سرگرم رہا۔ انہوں نے کہا کہ سکیورٹی فورسز نے ایک مشتبہ شخص کو گرفتار کیا ہے، جبکہ تحقیقات سے معلوم ہوا ہے کہ پاکستان اور قومی اداروں کے خلاف گمراہ کن معلومات پھیلانے والے مس انفارمیشن نیٹ ورک کا تعلق بھارت سے ہے۔

عطاء تارڑ نے کہا کہ کالعدم جوائنٹ ایکشن کمیٹی کے شرپسند عناصر پوری قوم کو جوابدہ ہیں اور ان کی مبینہ بھارتی فنڈنگ کے شواہد متعلقہ اداروں کے پاس موجود ہیں۔ ان کے مطابق متعدد بھارتی سوشل میڈیا اکاؤنٹس کی نشاندہی کی گئی ہے جو مسلسل عوام کو ریاستی اداروں کے خلاف اکسانے کی مہم چلا رہے تھے۔

انہوں نے مزید کہا کہ عسکری میدان کے بعد سفارتی محاذ پر بھی پاکستان نے اہم کامیابیاں حاصل کی ہیں، جبکہ بھارت کے خلاف پاکستان کے مؤقف کو عالمی سطح پر پذیرائی ملی ہے۔