شارجہ سے کراچی آنے والا نجی کارگو طیارہ سمندر میں لاپتہ، 5 افراد سوار، پاک بحریہ اور فضائیہ کا سرچ آپریشن جاری

کراچی: شارجہ سے کراچی آنے والا نجی کمپنی کا بوئنگ 737 کارگو طیارہ کراچی کے قریب بحیرۂ عرب میں لاپتہ ہوگیا، جس کے بعد پاک بحریہ، پاک فضائیہ اور دیگر متعلقہ اداروں نے وسیع پیمانے پر سرچ اینڈ ریسکیو آپریشن شروع کر دیا ہے۔

ذرائع کے مطابق لاپتہ طیارے کی تلاش کے لیے پاک بحریہ کا جنگی جہاز پی این ایس ذوالفقار متاثرہ علاقے میں پہنچ چکا ہے، جبکہ پاک فضائیہ کا سرچ طیارہ بولہاری سے روانہ ہو کر امدادی کارروائیوں میں حصہ لے رہا ہے۔

اسی طرح پاک بحریہ کا اے ٹی آر طیارہ تربت سے پرواز کر کے سرچ آپریشن میں شامل ہو چکا ہے، جبکہ پاکستان نیشنل شپنگ کارپوریشن کے تجارتی جہاز لاہور کو بھی تلاش اور امدادی کارروائیوں کے لیے تعینات کر دیا گیا ہے۔

پاکستان ایئرپورٹس اتھارٹی (PAA) نے نجی کارگو طیارے کے لاپتہ ہونے کی تصدیق کرتے ہوئے بتایا ہے کہ شارجہ سے کراچی آنے والی پرواز کے دوران طیارے سے اچانک رابطہ منقطع ہوگیا۔

ترجمان پی اے اے کے مطابق پرواز کے دوران پائلٹ نے نیویگیشن سسٹم میں خرابی کی اطلاع دی تھی، جس پر کراچی ایریا کنٹرول سینٹر (ACC) نے طیارے کو فوری تکنیکی رہنمائی فراہم کی۔ تاہم کچھ ہی دیر بعد طیارہ اچانک تیزی سے نیچے آیا اور اپنی سمت بھی تبدیل کر لی۔

حکام کے مطابق کراچی سے تقریباً 155 ناٹیکل میل مغرب میں طیارہ ریڈار سے غائب ہوگیا، جبکہ اسی وقت اس سے ریڈار اور مواصلاتی رابطہ بھی مکمل طور پر منقطع ہوگیا۔

واقعے کے فوراً بعد ریسکیو کوآرڈینیشن سینٹر کو فعال کر دیا گیا اور سمندر میں بڑے پیمانے پر سرچ اینڈ ریسکیو آپریشن شروع کیا گیا، جس میں پاک بحریہ، پاک فضائیہ اور دیگر متعلقہ ادارے حصہ لے رہے ہیں۔

ترجمان پی اے اے کے مطابق لاپتہ کارگو طیارے میں عملے کے پانچ افراد سوار ہیں، جبکہ ان کی تلاش کے لیے امدادی کارروائیاں تاحال جاری ہیں۔ حکام کا کہنا ہے کہ جیسے ہی مزید معلومات موصول ہوں گی، عوام کو آگاہ کیا جائے گا۔