کینیڈا میں معرکۂ حق کی تقریب، افواجِ پاکستان اور شہداء کو شاندار خراجِ عقیدت

(اوٹاوا ) اوٹاوا میں پاکستانی ہائی کمیشن میں منعقدہ مرکزی تقریب میں پاکستانی کمیونٹی، مختلف شعبہ ہائے زندگی سے تعلق رکھنے والی شخصیات اور پاکستان کے دوستوں کی بڑی تعداد نے شرکت کی۔

تقریب کے دوران صدرِ پاکستان، وزیرِ اعظم اور نائب وزیرِ اعظم و وزیرِ خارجہ کے خصوصی پیغامات پڑھ کر سنائے گئے، جن میں قومی یکجہتی، مسلح افواج کی بہادری اور وطن کے دفاع کے عزم کو اجاگر کیا گیا۔

کینیڈا میں پاکستان کے ہائی کمشنر محمد سلیم نے اپنے خطاب میں معرکۂ حق کے دوران افواجِ پاکستان کی جرات، پیشہ ورانہ مہارت اور قربانیوں کو زبردست خراجِ تحسین پیش کیا۔ انہوں نے کہا کہ مئی 2025 میں آپریشن “بنیان المرصوص” کے دوران پاکستان نے اپنے دفاع کے جائز حق کو استعمال کرتے ہوئے بین الاقوامی قانون اور قومی وقار پر ثابت قدمی کا مظاہرہ کیا۔

انہوں نے کہا کہ “معرکۂ حق” کی کامیابی اس حقیقت کی واضح یاد دہانی ہے کہ قومیں صرف عسکری طاقت سے نہیں بلکہ اپنے قومی مفادات اور جائز حقوق کے دفاع کے غیر متزلزل عزم سے مضبوط ہوتی ہیں۔

تقریب میں شہداء کے ایصالِ ثواب کے لیے خصوصی دعا بھی کی گئی۔ تقریب کے اختتام پر شرکاء نے اس عزم کا اظہار کیا کہ معرکۂ حق کی روح آنے والی نسلوں کے لیے قومی اتحاد، استقامت اور حب الوطنی کا ذریعہ بنتی رہے گی اور پاکستان کو مزید مضبوط اور باوقار بنانے میں اہم کردار ادا کرے گی۔