ایران کے خلاف جنگ کا کوئی جواز نہیں، بحری راستے فوری کھولے جائیں: چین

(بیجنگ) چین کی وزارت خارجہ نے ایران کے خلاف جاری کشیدگی پر سخت مؤقف اختیار کرتے ہوئے کہا ہے کہ جنگ کا کوئی جواز نہیں اور بحری راستوں کو فوری طور پر کھولنا چاہیے۔

چینی وزارت خارجہ کے مطابق ایران تنازع کا پرامن حل نہ صرف امریکا اور ایران بلکہ پورے خطے کے مفاد میں ہے۔ وزارت خارجہ نے زور دیا کہ مذاکرات اور سفارتی رابطوں کے چینلز جلد بحال کیے جائیں تاکہ ایک جامع اور دیرپا جنگ بندی ممکن بنائی جا سکے۔

بیان میں کہا گیا کہ صدر ڈونلڈ ٹرمپ اور چینی صدر شی جن پنگ کے درمیان مختلف امور پر اتفاق رائے پایا گیا ہے، جبکہ چین نے ہمیشہ مسائل کے حل کے لیے مکالمے اور مذاکرات کی حمایت کی ہے۔

چینی حکومت نے واضح کیا کہ ایران مسئلے کا فوجی حل خطے میں مزید عدم استحکام پیدا کرے گا، اس لیے عالمی برادری کی جانب سے بحری راستے کھولنے کے مطالبے پر فوری عمل ہونا چاہیے۔

وزارت خارجہ کے مطابق جنگ کو طول دینا کسی کے مفاد میں نہیں اور خطے میں کشیدگی کم کرنے کے لیے تمام فریقین کو تحمل اور سفارت کاری کا راستہ اختیار کرنا ہوگا۔