کروشیا کے صدر نے اسرائیلی سفیر کی تقرری مسترد کردی

صدارتی دفتر کی جانب سے جاری بیان میں کہا گیا ہے کہ اسرائیل کی جانب سے نامزد کیے گئے سفیر کو نہ صرف صدر کی منظوری نہیں ملی بلکہ آئندہ بھی اس منظوری کا امکان نہیں ہے۔

بیان میں واضح کیا گیا کہ اس فیصلے کی وجہ موجودہ اسرائیلی حکومت کی پالیسیاں ہیں۔

کروشین صدارتی دفتر کے مطابق ماضی میں سفیروں کی نامزدگیوں پر عوامی تبصرے سے گریز کیا جاتا رہا ہے کیونکہ یہ سفارتی روایات کے مطابق ایک غیر تحریری اصول سمجھا جاتا ہے۔ تاہم اسرائیل نے اس روایت سے ہٹتے ہوئے باضابطہ منظوری سے قبل ہی نامزد سفیر کا نام عوامی سطح پر ظاہر کر دیا۔

صدارتی بیان میں مزید کہا گیا کہ غیر ملکی سفیروں کو منظور یا مسترد کرنا کروشیا کا خودمختار حق ہے اور یہ اختیار صدرِ مملکت کے دائرہ اختیار میں آتا ہے۔

بیان کے مطابق کسی بھی قسم کا عوامی یا سیاسی دباؤ صدر کے فیصلے کو تبدیل نہیں کر سکتا۔