پاکستان سپر لیگ 12 کی تاریخوں کا اعلان، 18 مارچ 2027 سے میلہ سجے گا

لاہور: پاکستان کرکٹ بورڈ (پی سی بی) نے پاکستان سپر لیگ کے 12ویں ایڈیشن کی تاریخوں کا اعلان کردیا ہے۔ پی ایس ایل 12 کا میلہ 18 مارچ سے 2 مئی 2027 تک سجے گا۔

پی سی بی کے مطابق ایچ بی ایل پی ایس ایل کے 12ویں ایڈیشن میں مسلسل دوسری مرتبہ 8 ٹیمیں شرکت کریں گی۔ لیگ کی ونڈو گورننگ کونسل اور تمام فرنچائزز کے ساتھ مشاورت کے بعد حتمی کی گئی ہے۔

پی ایس ایل گورننگ کونسل کا اجلاس یکم ستمبر کو لندن میں ہوا، جس میں تمام 8 فرنچائزز کے مالکان اور نمائندوں نے شرکت کی۔

یاد رہے کہ پی ایس ایل 11 میں پہلی مرتبہ پلیئر ڈرافٹ کے بجائے پلیئر آکشن متعارف کرایا گیا تھا۔ ایونٹ کے فائنل میں قذافی اسٹیڈیم میں 32 ہزار 461 تماشائیوں نے شرکت کی، جو پی ایس ایل کی ریکارڈ حاضری تھی۔

چیئرمین پی سی بی محسن نقوی نے کہا کہ پی ایس ایل 11 نے دنیا کو لیگ کی صلاحیت دکھائی، جس کے دوران سنسنی خیز لمحات، ریکارڈ کراؤڈ اور براڈکاسٹ کے نئے ریکارڈ قائم ہوئے۔ انہوں نے پی ایس ایل کے ایک اور شاندار سیزن کے انعقاد کے عزم کا اظہار کیا۔

پی ایس ایل کے چیف ایگزیکٹو آفیسر سلمان نصیر نے کہا کہ 2027 میں شائقین کی توقعات پر پورا اترنے کے لیے بھرپور تیاری کی جائے گی۔ ان کے مطابق پی ایس ایل 12 کی ونڈو کا اعلان پہلا قدم ہے اور تمام 8 ٹیمیں ٹائٹل کے لیے پہلے سے زیادہ پُرعزم ہوں گی۔

پی سی بی کے مطابق پی ایس ایل 12 میں ڈائریکٹ سائننگز، پلیئر آکشن، میچز کے شیڈول، وینیوز اور ٹکٹنگ سے متعلق مزید تفصیلات بعد میں جاری کی جائیں گی۔

یاد رہے کہ پشاور زلمی نے پی ایس ایل 11 کا ٹائٹل اپنے نام کیا تھا۔ زلمی نے فائنل میں حیدرآباد کنگزمین کو 5 وکٹوں سے شکست دے کر 9 سال بعد پی ایس ایل ٹرافی جیتی تھی۔