ایران کے جواب کا انتظار کریں گے، معاہدے تک کوئی ریلیف نہیں ملے گا: ٹرمپ

(واشنگٹن) امریکی صدر ڈونلڈ ٹرمپ نے ایران کے ساتھ ممکنہ معاہدے کے حوالے سے سخت مؤقف اختیار کرتے ہوئے کہا ہے کہ امریکہ ایران کے جواب کا چند روز انتظار کرے گا، تاہم کسی بھی معاہدے سے پہلے تہران کو کوئی ریلیف فراہم نہیں کیا جائے گا۔

میڈیا سے گفتگو کرتے ہوئے امریکی صدر نے کہا کہ ایران کو معاہدہ کرنا ہوگا، ورنہ وہ جانتے ہیں کہ پھر کیا ہوگا۔ انہوں نے واضح کیا کہ امریکہ ایران کے معاملے میں جلد بازی نہیں کرے گا، تاہم اگر تہران معاہدہ کر لیتا ہے تو یہ سب کے لیے بہتر ہوگا۔

ٹرمپ کا کہنا تھا کہ امریکہ ہر قسم کی کارروائی کے لیے تیار ہے اور واشنگٹن ایران کے اندر موجود “ذہین لوگوں” سے رابطے میں ہے۔ انہوں نے کہا کہ امریکہ کو ایران کی جانب سے “درست جواب” درکار ہے۔

امریکی صدر نے دعویٰ کیا کہ ایران معاہدہ کرنے کے لیے بے تاب ہے، تاہم ساتھ ہی انہوں نے خبردار کیا کہ اگر ایران کے ساتھ ڈیل نہ ہوئی تو امریکہ دوبارہ حملہ بھی کر سکتا ہے۔ ان کے مطابق ایران کے اندر معاشی حالات انتہائی خراب ہیں اور عوام شدید غم و غصے کا شکار ہیں۔

ٹرمپ نے کہا کہ ایران جنگ کو ابھی صرف تین ماہ ہوئے ہیں جبکہ اس دوران زیادہ وقت سیز فائر میں گزرا ہے۔ انہوں نے آبنائے ہرمز کھولنے کا عندیہ دیتے ہوئے کہا کہ انہیں کسی قسم کی جلدی نہیں۔

انہوں نے مزید دعویٰ کیا کہ ایران کو بری طرح تباہ کر دیا گیا ہے اور آنے والے دنوں میں مزید پیش رفت دیکھی جائے گی۔ ان کا کہنا تھا کہ امریکہ ایران کے ساتھ کسی بھی معاہدے پر جلد بازی نہیں کرے گا۔

اپنی گفتگو کے دوران ٹرمپ نے کیوبا کا ذکر کرتے ہوئے کہا کہ کیوبا ایک ناکام ریاست بن چکا ہے جہاں عوام شدید مشکلات کا شکار ہیں۔ انہوں نے کہا کہ امریکہ کو کیوبا کے عوام کی مدد کرنی ہوگی۔