ایران کے عبوری معاہدے سے دستبرداری پر ٹرمپ کا سخت ردعمل، "ذرا بھی پروا نہیں"

(واشنگٹن) امریکی صدر ڈونلڈ ٹرمپ نے ایران کی جانب سے عبوری معاہدے سے دستبرداری کے اعلان پر سخت ردعمل دیتے ہوئے کہا ہے کہ انہیں اس فیصلے کی "ذرا بھی پروا نہیں"۔

قطری نشریاتی ادارے کے مطابق صدر ٹرمپ نے امریکی کیبل نیوز نیٹ ورک نیوز نیشن کو دیے گئے مختصر ٹیلی فونک انٹرویو میں ایران کے اعلان پر تبصرہ کرتے ہوئے کہا کہ اگر تہران معاہدے پر عمل نہیں کرتا تو امریکا کو بھی اس کی کوئی فکر نہیں۔

امریکی صدر نے ایک بار پھر اپنے مؤقف کا اعادہ کرتے ہوئے کہا کہ امریکا کا بنیادی مقصد یہ یقینی بنانا ہے کہ ایران کسی بھی صورت میں جوہری ہتھیار حاصل نہ کر سکے۔

اسلام آباد میں طے پانے والی مفاہمتی یادداشت کے مطابق یہ معاہدہ گزشتہ ماہ امریکا اور ایران کے درمیان اس جنگ کے خاتمے کے لیے کیا گیا تھا، جس کا آغاز امریکا اور اسرائیل کی جانب سے فروری میں ہونے والی کارروائیوں کے بعد ہوا تھا۔

رپورٹس کے مطابق حالیہ کشیدگی اور مہلک حملوں کا سلسلہ آبنائے ہرمز کے انتظام اور سکیورٹی سے متعلق اختلافات کے باعث شدت اختیار کر گیا۔

دوسری جانب روسی میڈیا نے دعویٰ کیا ہے کہ اردن میں ایرانی میزائل حملے کے نتیجے میں 2 امریکی فوجیوں کی ہلاکت کے بعد صدر ٹرمپ نے پینٹاگون کو ایران کے خلاف بھرپور فوجی کارروائی کی ہدایت دی ہے۔

روسی میڈیا کے مطابق صدر ٹرمپ نے واقعے پر افسوس کا اظہار کرتے ہوئے کہا کہ امریکی فوجیوں کی ہلاکت انتہائی افسوسناک ہے، تاہم امریکا ایران کو کبھی بھی جوہری ہتھیار حاصل نہیں کرنے دے گا۔

اس سے قبل امریکی وزیر دفاع پیٹ ہیگستھ نے بھی اردن میں امریکی فوجی اڈے پر حملے میں دو اہلکاروں کی ہلاکت پر ردعمل دیتے ہوئے کہا تھا کہ ان کی قربانی امریکا کے عزم کو مزید مضبوط کرے گی۔

واضح رہے کہ ایران کے بیلسٹک میزائل حملے میں دو امریکی فوجیوں کی ہلاکت کی تصدیق امریکی سینٹرل کمانڈ (سینٹ کام) بھی کر چکی ہے۔