پاکستان میں ایک ماہ سے لطف اندوز ہو رہے ہیں، سیکیورٹی سے مطمئن ہیں، سری لنکن کپتان

راولپنڈی: سری لنکن ٹیسٹ ٹیم کے کپتان کوشال مینڈس نے کہا ہے کہ پاکستان میں ایک ماہ قیام کے دوران یہاں کے موسم اور کھانوں سے خوب لطف اندوز ہو رہے ہیں، جبکہ سیکیورٹی انتظامات پر بھی مکمل اطمینان ہے۔

میڈیا سے گفتگو کرتے ہوئے کوشال مینڈس نے کہا کہ پاکستان میں ان کی ٹیم کو آئے ایک ماہ ہو چکا ہے اور کھلاڑی یہاں کے ماحول، موسم اور کھانوں کو بہت انجوائے کر رہے ہیں۔

سری لنکن کپتان کا کہنا تھا کہ ٹی ٹوئنٹی اور ون ڈے کرکٹ کے مقابلے میں ٹیسٹ کرکٹ بالکل مختلف ہوتی ہے، اس لیے ٹیسٹ میچز میں بہترین کھیل پیش کرنے کے لیے خصوصی تیاری کر رہے ہیں۔

انہوں نے کہا کہ پریکٹس میچ کھیلنے سے ٹیم کا اعتماد بھی بحال ہوا ہے اور کل ہونے والے میچ کے لیے تیاریاں مکمل ہیں۔

کوشال مینڈس کے مطابق سری لنکن ٹیم میں سینئر اور جونیئر کھلاڑیوں کا بہترین کمبینیشن موجود ہے۔ تمام کھلاڑیوں کی خواہش ہے کہ ٹیسٹ میچز میں اچھی کارکردگی کا مظاہرہ کریں اور ٹیم کی کامیابی میں اپنا کردار ادا کریں۔