فیلڈ مارشل عاصم منیر کی ترکیہ کی اعلیٰ قیادت سے ملاقاتیں، ترک مسلح افواج کے ’ڈسٹنگوشڈ سروس میڈل‘ سے نوازا گیا

چیف آف آرمی اسٹاف، فیلڈ مارشل سید عاصم منیر نے ترکیہ کا اعلیٰ سطحی سرکاری دورہ کیا، جس کا مقصد پاکستان اور ترکیہ کے درمیان دیرینہ اسٹریٹجک اور دفاعی تعاون کو مزید مضبوط بنانا ہے۔

پاک فوج کے شعبہ تعلقات عامہ (آئی ایس پی آر) کے مطابق ترکیہ پہنچنے پر فیلڈ مارشل سید عاصم منیر کا پرتپاک استقبال کیا گیا، جو دونوں برادر ممالک کے مضبوط اور تاریخی تعلقات کی عکاسی کرتا ہے۔

دورے کے دوران فیلڈ مارشل سید عاصم منیر نے ترکیہ کے صدر رجب طیب اردوان، وزیرِ قومی دفاع یاشار گولر اور دیگر اعلیٰ سیاسی و عسکری حکام سے ملاقاتیں کیں۔ ان ملاقاتوں میں باہمی دلچسپی کے امور، علاقائی سلامتی کی صورتحال، دفاعی تعاون اور مشترکہ اسٹریٹجک شراکت داری کو مزید فروغ دینے پر تبادلہ خیال کیا گیا۔

فیلڈ مارشل سید عاصم منیر نے ترک جنرل اسٹاف ہیڈکوارٹرز کا بھی دورہ کیا، جہاں انہیں گارڈ آف آنر پیش کیا گیا۔ اس موقع پر ترک جنرل اسٹاف کے سربراہ جنرل سلجوق بایراکتار اوغلو سے ہونے والی ملاقات میں پیشہ ورانہ عسکری تعاون، علاقائی سلامتی اور دوطرفہ دفاعی روابط پر تفصیلی گفتگو ہوئی۔

ترک جنرل اسٹاف کے سربراہ جنرل سلجوق بایراکتار اوغلو نے پاکستان اور ترکیہ کے درمیان دفاعی تعاون کے فروغ اور نمایاں عسکری خدمات کے اعتراف میں فیلڈ مارشل سید عاصم منیر کو ترک مسلح افواج کا 'ڈسٹنگوشڈ سروس میڈل' عطا کیا۔

فیلڈ مارشل سید عاصم منیر نے ترک بری افواج کے ہیڈکوارٹرز کا بھی دورہ کیا، جہاں ترک بری افواج کے کمانڈر جنرل میٹن توکل نے ان کا استقبال کیا اور دونوں افواج کے درمیان پیشہ ورانہ تعاون کو مزید وسعت دینے کے عزم کا اظہار کیا۔

اپنے دورہ ترکیہ کے دوران فیلڈ مارشل سید عاصم منیر نے جدید ترکیہ کے بانی مصطفیٰ کمال اتاترک کے مزار پر بھی حاضری دی، پھولوں کی چادر چڑھائی اور انہیں خراجِ عقیدت پیش کیا۔

آئی ایس پی آر کے مطابق فیلڈ مارشل نے اس موقع پر مصطفیٰ کمال اتاترک کی مدبرانہ قیادت کو سراہتے ہوئے پاکستان اور ترکیہ کے درمیان تاریخی، برادرانہ اور مضبوط تعلقات کو مزید مستحکم بنانے کے عزم کا اعادہ کیا۔