وائٹ ہاؤس کے قریب چیک پوسٹ پر فائرنگ، حملہ آور ہلاک، ٹرمپ محفوظ مقام پر منتقل

(واشنگٹن )امریکی دارالحکومت واشنگٹن میں وائٹ ہاؤس کے قریب قائم سکیورٹی چیک پوسٹ پر فائرنگ کے واقعے میں حملہ آور ہلاک ہوگیا جبکہ متعدد افراد زخمی ہوئے۔ امریکی میڈیا کے مطابق مسلح شخص نے اچانک چیک پوسٹ پر فائرنگ شروع کر دی جس کے بعد سیکریٹ سروس اہلکاروں نے فوری جوابی کارروائی کی۔

رپورٹس کے مطابق حملہ آور موقع پر مارا گیا تاہم اس کی شناخت تاحال ظاہر نہیں کی گئی۔ امریکی میڈیا کا کہنا ہے کہ حملہ آور جذباتی دباؤ کا شکار تھا، تاہم اس پریشانی کی نوعیت کے بارے میں کوئی تفصیلات سامنے نہیں آئیں۔

فائرنگ کے تبادلے کے دوران 2 افراد گولیوں کا نشانہ بنے جبکہ سڑک پر موجود ایک راہگیر بھی زخمی ہوگیا۔ حکام کے مطابق واقعے میں کوئی سکیورٹی اہلکار زخمی نہیں ہوا۔

واقعہ مقامی وقت کے مطابق شام 6 بجے کے قریب پیش آیا، جس کے بعد وائٹ ہاؤس کو فوری طور پر لاک ڈاؤن کر دیا گیا۔ بعد ازاں صورتحال قابو میں آنے پر لاک ڈاؤن ختم کر دیا گیا۔

میڈیا رپورٹس کے مطابق فائرنگ کے وقت صدر ڈونلڈ ٹرمپ وائٹ ہاؤس میں موجود تھے اور سکیورٹی حکام نے انہیں فوری طور پر محفوظ مقام پر منتقل کر دیا۔ عینی شاہدین اور صحافیوں کا کہنا ہے کہ وائٹ ہاؤس کے باہر تقریباً 30 گولیاں چلنے کی آوازیں سنی گئیں۔

واقعے کے بعد وائٹ ہاؤس کی چھت پر سنائپرز تعینات کر دیے گئے جبکہ نارتھ لان میں موجود صحافیوں کو فوری طور پر پریس بریفنگ روم منتقل ہونے کی ہدایت دی گئی۔ اے بی سی نیوز سمیت کئی ٹی وی چینلز کے رپورٹرز اس وقت لائیو رپورٹنگ کر رہے تھے، جس کے باعث فائرنگ کی آوازیں براہِ راست نشریات میں بھی سنائی دیں۔