آزاد کشمیر میں کلیئرنس آپریشن کے دوران فائرنگ، رینجرز اہلکار شہید، دوسرا شدید زخمی

آزاد کشمیر میں سرساوہ تا تراڑ کھل سڑک کی کلیئرنس کے دوران مسلح افراد کی فائرنگ سے رینجرز کا ایک اہلکار شہید جبکہ دوسرا شدید زخمی ہوگیا۔

ذرائع کے مطابق علاقے میں آمد و رفت کی مشکلات اور غذائی قلت کے باعث مقامی آبادی کے مطالبے پر بند راستے کھولنے کے لیے سیکیورٹی فورسز کی جانب سے کلیئرنس آپریشن جاری تھا۔ اسی دوران مسلح افراد کے مبینہ اسنائپرز نے قانون نافذ کرنے والے اداروں کے اہلکاروں کو نشانہ بنایا۔

فائرنگ کے نتیجے میں رینجرز کے سپاہی شاہ نواز کے سینے میں گولی لگی، جس کے باعث وہ شہید ہوگئے، جبکہ لانس نائیک بلال کے کندھے پر گولی لگی اور وہ شدید زخمی ہوئے۔

شہید سپاہی شاہ نواز کا تعلق خیرپور، سندھ سے بتایا گیا ہے۔ واقعے کے بعد علاقے میں سیکیورٹی مزید سخت کردی گئی ہے جبکہ حملہ آوروں کی گرفتاری اور علاقے کو محفوظ بنانے کے لیے کارروائیاں جاری ہیں۔

ماہرین کا کہنا ہے کہ سیکیورٹی اہلکاروں پر جدید اسلحے اور بارودی مواد سے حملے ریاستی اداروں کے لیے سنگین خطرہ ہیں۔ ان کے مطابق ایسے واقعات کے پسِ منظر اور حملے میں ملوث عناصر کی مکمل تحقیقات ضروری ہیں، جبکہ قانون نافذ کرنے والے اہلکاروں کو نشانہ بنانے والوں کے خلاف قانون کے مطابق کارروائی کی جانی چاہیے۔

رینجرز اہلکار کی شہادت پر سیکیورٹی حلقوں اور شہریوں کی جانب سے افسوس کا اظہار کیا گیا ہے، جبکہ زخمی اہلکار کی جلد صحت یابی کے لیے دعا کی جارہی ہے۔