مکہ دفاعی معاہدے کے تحت سہ ملکی کمیٹی کا پہلا اجلاس آج استنبول میں ہوگا

پاکستان، ترکیہ اور سعودی عرب کے درمیان مکہ مشترکہ دفاعی معاہدے کے تحت سہ ملکی کمیٹی کا پہلا اجلاس آج ترکیہ کے شہر استنبول میں ہوگا، جس میں تینوں ممالک کے اعلیٰ حکام شرکت کریں گے۔

پاکستان کی نمائندگی نائب وزیراعظم و وزیر خارجہ اسحاق ڈار، وزیر دفاع خواجہ آصف اور فیلڈ مارشل سید عاصم منیر کریں گے، جبکہ ترکیہ اور سعودی عرب کے وزرائے خارجہ، وزرائے دفاع اور چیفس آف جنرل اسٹاف بھی اجلاس میں شریک ہوں گے۔

نائب وزیراعظم اسحاق ڈار اور فیلڈ مارشل سید عاصم منیر اجلاس میں شرکت کے لیے ترکیہ پہنچ چکے ہیں۔

دفاعی اور سکیورٹی تعاون پر اہم مشاورت

اجلاس میں پاکستان، ترکیہ اور سعودی عرب کے درمیان دفاعی اور سکیورٹی تعاون کو مزید مضبوط بنانے پر اہم مشاورت ہوگی۔

تینوں ممالک کے حکام عالمی سلامتی کی صورتحال، علاقائی امن و استحکام اور مشترکہ دفاعی صلاحیتوں کو مزید مؤثر بنانے کے اقدامات پر تبادلہ خیال کریں گے۔

اجلاس میں دفاعی صنعت کے شعبے میں مشترکہ پیداوار، ٹیکنالوجی کے تبادلے اور دفاعی تعاون کو وسعت دینے کے امکانات بھی زیر غور آنے کا امکان ہے۔

اسحاق ڈار کی حاقان فیدان سے ملاقات

اجلاس سے قبل نائب وزیراعظم و وزیر خارجہ اسحاق ڈار نے ترکیہ کے وزیر خارجہ حاقان فیدان سے ملاقات کی۔

ملاقات میں پاکستان اور ترکیہ کے دوطرفہ تعلقات، علاقائی صورتحال اور امن و استحکام سے متعلق امور پر تبادلہ خیال کیا گیا۔

اسحاق ڈار نے علاقائی امن و استحکام کے لیے پاکستان کی جانب سے دیرپا کوششیں جاری رکھنے کے عزم کا اعادہ کیا، جبکہ دونوں ممالک کے درمیان تعلقات کے مسلسل استحکام اور توسیع پر اطمینان کا اظہار بھی کیا گیا۔

اسحاق ڈار کی حضرت ابو ایوب انصاریؓ کے مزار پر حاضری

نائب وزیراعظم اسحاق ڈار نے استنبول میں حضرت ابو ایوب انصاریؓ کے مزار پر بھی حاضری دی۔

انہوں نے مزار پر عقیدت و احترام کا اظہار کیا اور پاکستان و پاکستانی عوام کے امن، خوشحالی اور امت مسلمہ کے اتحاد کے لیے دعا کی۔

پاکستان اور ترکیہ کی اسٹریٹجک شراکت داری

وزیراعظم شہباز شریف نے کہا ہے کہ پاکستان اور ترکیہ کی اسٹریٹجک شراکت داری مشترکہ خوشحالی اور سکیورٹی کی ضامن ہے۔

وزیراعظم کے مطابق مکہ معاہدے نے پاکستان اور ترکیہ کے درمیان اسٹریٹجک بھائی چارے کی مزید تصدیق کی ہے اور یہ معاہدہ پاکستان اور ترکیہ کو سعودی عرب کے ساتھ مضبوطی سے جوڑتا ہے۔

شہباز شریف نے کہا کہ مکہ دفاعی معاہدہ تینوں ممالک کے درمیان مشترکہ تحفظ اور دفاعی قوت کو مزید مضبوط بنانے کی راہ ہموار کرتا ہے۔