امام الحق اور محمد رضوان این سی سی آئی اے میں پیش، جواب کے لیے وقت مانگ لیا

قومی کرکٹرز امام الحق اور محمد رضوان انگلینڈ سیریز کے دوران ڈریسنگ روم سے متعلق مبینہ لیکس کی تحقیقات کے سلسلے میں نیشنل سائبر کرائم انویسٹی گیشن ایجنسی (این سی سی آئی اے) لاہور آفس میں پیش ہوگئے۔

این سی سی آئی اے نے دونوں کرکٹرز کو نوٹس جاری کرکے طلب کیا تھا۔ ذرائع کے مطابق امام الحق اور محمد رضوان نے حکام کے سامنے پیش ہوکر اپنا جواب جمع کرانے کے لیے مزید وقت مانگ لیا ہے۔

ذرائع کا کہنا ہے کہ پاکستان کرکٹ بورڈ نے دونوں کھلاڑیوں کے موبائل فون این سی سی آئی اے کے حوالے کیے ہیں، جنہیں ان لاک کروا کر انگلینڈ سیریز کے دوران ڈریسنگ روم سے متعلق معلومات اور مبینہ لیکس کی تحقیقات کی جائیں گی۔

پی سی بی ذرائع کے مطابق معاملے پر فی الحال کوئی حتمی تبصرہ نہیں کیا جائے گا کیونکہ انکوائری ابھی جاری ہے۔ ذرائع نے کہا کہ کھلاڑیوں اور دیگر آفیشلز کے حوالے سے سوشل میڈیا پر گردش کرنے والی غیرمصدقہ اور بے بنیاد خبروں سے گریز کیا جائے۔

واضح رہے کہ پی سی بی نے دورہ انگلینڈ کے دوران قومی ٹیم کے بعض کھلاڑیوں کی جانب سے مبینہ ڈسپلن کی خلاف ورزیوں کے معاملے پر اندرونی انکوائری کا بھی اعلان کیا تھا۔

پی سی بی ترجمان کے مطابق انکوائری کے دوران تمام متعلقہ افراد کا مؤقف اور دستیاب شواہد سامنے رکھے جائیں گے، جبکہ عوام سے کہا گیا ہے کہ وہ معاملے سے متعلق معلومات کے لیے صرف پی سی بی کے باضابطہ بیانات پر اعتماد کریں۔