کیا عمران عباس نے شوبز کو خیرباد کہہ دیا؟ اداکار نے حقیقت بتا دی

کراچی: پاکستان کے معروف اداکار عمران عباس نے شوبز چھوڑنے اور ٹی وی اسکرین پر واپسی سے متعلق گردش کرنے والی خبروں پر وضاحت کرتے ہوئے کہا ہے کہ فی الحال ان کا کسی نئے ڈرامے میں کام کرنے کا کوئی ارادہ نہیں۔

اداکار نے انسٹاگرام پر مداحوں کے ساتھ سوال و جواب کا سیشن رکھا، جہاں ایک مداح نے ان سے نئے ڈرامے کے بارے میں سوال کیا۔

عمران عباس نے جواب دیتے ہوئے کہا کہ ان کا کوئی نیا ڈرامہ نشر ہونے والا نہیں کیونکہ انہوں نے حالیہ عرصے میں کسی بھی ٹی وی پراجیکٹ پر دستخط نہیں کیے۔

انہوں نے مزید بتایا کہ وہ فی الحال شوبز میں واپسی کی منصوبہ بندی نہیں کر رہے اور اپنی تمام تر توجہ کاروباری سرگرمیوں پر مرکوز کیے ہوئے ہیں۔

اداکار نے یہ بھی واضح کیا کہ ان کا موجودہ فیصلہ شوبز سے مستقل کنارہ کشی کا اعلان نہیں بلکہ ایک عارضی وقفہ ہے، جبکہ مستقبل میں کسی مناسب منصوبے پر غور کیا جا سکتا ہے۔

واضح رہے کہ عمران عباس پاکستان کے معروف اداکاروں میں شمار ہوتے ہیں اور وہ متعدد کامیاب ڈراموں میں اپنی بہترین اداکاری سے مداحوں کے دل جیت چکے ہیں۔

ماضی میں بھی وہ اس بات کا اظہار کر چکے ہیں کہ موجودہ دور کے بیشتر ڈراموں کے اسکرپٹس انہیں اتنے متاثر نہیں کرتے کہ وہ دوبارہ ٹی وی اسکرین پر واپسی کا فیصلہ کریں، یہی وجہ ہے کہ وہ گزشتہ کچھ عرصے سے ڈرامہ انڈسٹری سے دور ہیں۔

یاد رہے کہ حال ہی میں 9 محرم الحرام کے موقع پر عمران عباس نے عراق کے مقدس شہر کربلا سے اپنی روحانی حاضری کی تصاویر اور ویڈیوز سوشل میڈیا پر شیئر کی تھیں، جن میں انہیں مقدس مقامات کی زیارت، سبیلوں میں شرکت اور کربلا کے تاریخی عجائب گھر کا دورہ کرتے ہوئے دیکھا گیا۔