بھارت میں پہلے جیسا امن محسوس نہیں ہوتا، حالیہ بیان پر سنجے دت کا مؤقف سامنے آگیا

ممبئی: بالی ووڈ اداکار سنجے دت نے بھارت میں امن کی صورتحال سے متعلق اپنے حالیہ بیان پر وضاحت جاری کرتے ہوئے کہا ہے کہ ان کی گفتگو کو سیاق و سباق سے ہٹ کر پیش کیا گیا۔

سنجے دت نے سوشل میڈیا پر جاری بیان میں کہا کہ ان کے ریمارکس ایک اسکرپٹڈ گفتگو کا حصہ تھے اور انہیں مزاحیہ انداز میں بیان کیا گیا تھا۔ اداکار کے مطابق ان کا مقصد کسی فرد، برادری یا ادارے کی دل آزاری یا بے عزتی کرنا نہیں تھا۔

اداکار نے وضاحت کرتے ہوئے کہا کہ گفتگو کا انداز ان کی فلم ’منا بھائی‘ کے مزاح اور طنز سے مشابہ تھا، جس کے ذریعے محبت، اپنائیت، اتحاد اور خیرسگالی کا پیغام دیا جاتا ہے۔

سنجے دت کے یہ ریمارکس ایک شو کے دوران سامنے آئے تھے، جہاں انہوں نے بھارت کے عوام کو گرمجوش اور مہمان نواز قرار دیتے ہوئے کہا تھا کہ انہیں اب ملک میں پہلے جیسا امن محسوس نہیں ہوتا۔

ان کے اس بیان کے بعد سوشل میڈیا پر مختلف ردعمل سامنے آئے، جس کے بعد اداکار نے اپنا وضاحتی بیان جاری کیا۔

سنجے دت نے واضح کیا کہ ان کی گفتگو کا مقصد کسی مخصوص شخص یا طبقے کو نشانہ بنانا نہیں تھا بلکہ بات چیت میں مزاح اور طنز کا انداز اختیار کیا گیا تھا۔