امریکی کانگریس میں ایران جنگ کے دوران 39 طیارے تباہ ہونے کا دعویٰ

ڈیموکریٹک رکن کانگریس ایڈورڈ کیس نے سینیٹ کمیٹی کے اجلاس میں چیف فنانشل آفیسر جے ہرسٹ سے اس معاملے پر سخت سوالات کیے، تاہم حکام کی جانب سے واضح جواب دینے کے بجائے محتاط اور مبہم مؤقف اختیار کیا گیا۔

ایڈورڈ کیس نے اپنی گفتگو میں امریکی دفاعی ویب سائٹ “دی وار زون” کی ایک رپورٹ کا حوالہ دیا، جس کے مطابق 39 روزہ مبینہ جنگ کے دوران امریکی فضائیہ نے تقریباً 13 ہزار فضائی مشنز انجام دیے۔ رپورٹ میں دعویٰ کیا گیا کہ اس عرصے کے دوران امریکا کے 39 طیارے تباہ جبکہ مزید 10 طیاروں کو مختلف نوعیت کا نقصان پہنچا۔

رپورٹ کے مطابق تباہ یا متاثر ہونے والے عسکری اثاثوں میں 24 MQ-9 ریپر ڈرونز ، متعدد ایف-15 اور اے-10 لڑاکا طیارے شامل تھے۔

مزید یہ دعویٰ بھی کیا گیا کہ جدید F-35 Lightning II اسٹیلتھ طیارہ ایرانی فضائی حدود میں نشانہ بنایا گیا، تاہم اس کا پائلٹ محفوظ رہا۔ رپورٹ میں بعض امریکی طیاروں کےکویت کی فضائی حدود میں تباہ ہونے کا بھی ذکر کیا گیا ہے۔

رپورٹ کے مطابق کچھ امریکی عسکری اثاثوں کو مخالف فورسز کے قبضے میں جانے سے روکنے کیلئے خود امریکی فورسز نے تباہ کیا۔ تاہم ان تمام دعوؤں کی تاحال کسی آزاد یا سرکاری ذریعے سے باضابطہ تصدیق نہیں ہو سکی۔