عوامی حقوق تسلیم کیے بغیر کوئی معاہدہ ممکن نہیں: ایرانی اسپیکر محمد باقر قالیباف

(تہران) محمد باقر قالیباف نے کہا ہے کہ ایرانی عوام کے بنیادی حقوق کو تسلیم کیے بغیر کسی بھی معاہدے تک پہنچنا ممکن نہیں۔

ایرانی اسپیکر نے سماجی رابطے کی ویب سائٹ ایکس پر اپنے بیان میں کہا کہ ایران کے 14 نکاتی منصوبے میں بیان کیے گئے عوامی حقوق کو قبول کرنے کے سوا کوئی دوسرا راستہ موجود نہیں۔

محمد باقر قالیباف کے مطابق اس کے علاوہ اختیار کیا جانے والا کوئی بھی طریقہ مکمل طور پر بے نتیجہ ثابت ہوگا اور صرف ایک کے بعد دوسری ناکامی کا سبب بنے گا۔

انہوں نے امریکا کو تنبیہ کرتے ہوئے کہا کہ جتنا زیادہ وقت ضائع کیا جائے گا، اس کی قیمت امریکی ٹیکس دہندگان کو ادا کرنا پڑے گی۔

ایرانی اسپیکر کا یہ بیان ایسے وقت سامنے آیا ہے جب تہران اور واشنگٹن کے درمیان کشیدگی، جنگ بندی اور جوہری مذاکرات سے متعلق بیانات میں شدت دیکھی جا رہی ہے۔