ایرانی قوم کی طاقت آبادی میں اضافے سے جڑی ہے، شرح پیدائش بڑھانا قومی ضرورت ہے: مجتبیٰ خامنہ ای

(تہران) ایران کے سپریم لیڈر مجتبیٰ خامنہ ای نے قومی پاپولیشن ڈے کے موقع پر آبادی میں اضافے اور شرح پیدائش کو فروغ دینے کی ضرورت پر زور دیتے ہوئے کہا ہے کہ ایرانی قوم کی طاقت اور اس کے مستقبل کا تسلسل براہِ راست آبادی بڑھنے سے وابستہ ہے۔

ایرانی میڈیا کے مطابق اپنے خصوصی پیغام میں مجتبیٰ خامنہ ای نے بچوں کی پیدائش کے رجحان کو فروغ دینے کے لیے مؤثر اقدامات اور عوامی شعور بیدار کرنے کی کوششیں تیز کرنے کی ضرورت پر زور دیا۔

انہوں نے آبادی کے شعبے میں سرگرم کارکنوں کے اس خط کا جواب بھی دیا جس میں ان کے والد آیت اللہ علی خامنہ ای کی شہادت پر تعزیت اور عقیدت کا اظہار کیا گیا تھا۔

مجتبیٰ خامنہ ای نے کہا کہ آبادی میں اضافے کی پالیسی کو صرف ماضی کی غلطیوں کی تلافی کے طور پر نہیں دیکھنا چاہیے بلکہ اس کا ایک اہم سٹریٹجک اور قومی پہلو بھی ہے۔ ان کے مطابق مضبوط آبادی مستقبل میں ایران کو عالمی سطح پر زیادہ مؤثر کردار ادا کرنے اور اہم سٹریٹجک کامیابیاں حاصل کرنے کے قابل بنا سکتی ہے۔

انہوں نے کہا کہ درست اور طویل المدتی آبادی پالیسی پر عمل کرتے ہوئے ایرانی قوم نئی اسلامی ایرانی تہذیب کی تشکیل کی جانب نمایاں پیش رفت کر سکتی ہے۔

ایرانی سپریم لیڈر نے مزید کہا کہ مرحوم رہبر نے بھی عوامی و نجی ملاقاتوں اور خط و کتابت میں آبادی کے مسئلے کو ہمیشہ اہم قومی ترجیح قرار دیا تھا اور اسے اسلامی نظام کے اہم ترین سٹریٹجک معاملات میں شامل کیا جاتا رہا ہے۔

انہوں نے آبادی کے شعبے میں کام کرنے والے عوامی کارکنوں کی خدمات کو سراہتے ہوئے کہا کہ ان کی مسلسل کوششیں اور بچوں کی پیدائش کے رجحان کو فروغ دینا ایران کے روشن مستقبل کی ضمانت بن سکتا ہے۔