ایرانی وزیر خارجہ عباس عراقچی کا فیلڈ مارشل عاصم منیر سے رابطہ، خطے کی صورتحال پر گفتگو

اسلام آباد: ایرانی وزیر خارجہ عباس عراقچی اور فیلڈ مارشل عاصم منیر کے درمیان ٹیلی فونک رابطہ ہوا ہے، جس میں خطے کی تازہ ترین صورتحال سمیت مختلف اہم امور پر تبادلہ خیال کیا گیا۔

ایرانی میڈیا کے مطابق دونوں رہنماؤں کے درمیان ہونے والی گفتگو میں موجودہ علاقائی صورتحال، حالیہ سفارتی پیش رفت اور خطے میں امن و استحکام سے متعلق معاملات زیر بحث آئے۔

ٹیلی فونک رابطے کے دوران فیلڈ مارشل عاصم منیر اور ایرانی وزیر خارجہ عباس عراقچی نے حالیہ سفارتی عمل اور سیاسی و سفارتی حل کو آگے بڑھانے کے لیے جاری کوششوں پر بھی تبادلہ خیال کیا۔

دونوں جانب سے باہمی مشاورت اور تعاون کو مزید مستحکم کرنے کے عزم کا اظہار کیا گیا، جبکہ علاقائی معاملات پر رابطے اور سفارتی کوششوں کو جاری رکھنے کی اہمیت پر بھی زور دیا گیا۔

یہ رابطہ ایسے وقت میں ہوا ہے جب خطے میں تیزی سے بدلتی ہوئی سیاسی اور سفارتی صورتحال کے تناظر میں مختلف ممالک کے درمیان مشاورت کا سلسلہ جاری ہے۔