ایرانی سپریم لیڈر کی امریکا کے ساتھ ’نہ جنگ، نہ امن‘ کی کیفیت ختم کرنے کی ہدایت، مذاکرات پر زور

تہران: ایران کے صدر مسعود پزشکیان نے کہا ہے کہ سپریم لیڈر آیت اللہ سید مجتبیٰ خامنہ ای نے امریکا کے ساتھ جاری ’نہ جنگ، نہ امن‘ کی صورتحال ختم کرنے کی ہدایت کردی ہے۔

ایرانی صدر کے مطابق سپریم لیڈر نے متعلقہ حکام کو ہدایت کی ہے کہ باوقار انداز میں مذاکرات کے ذریعے موجودہ کشیدہ صورتحال کا خاتمہ کیا جائے۔ ان کا کہنا تھا کہ اگر مذاکرات کے ذریعے ایران کے حقوق حاصل کیے جاسکتے ہیں تو جنگ سے گریز کیا جانا چاہیے، تاہم دھمکیوں، دباؤ اور طاقت کے استعمال کے ذریعے ایران کو جھکانے کی کوئی کوشش قبول نہیں کی جائے گی۔

مسعود پزشکیان نے کہا کہ ایران برابری اور انصاف کی بنیاد پر مذاکرات کا حامی ہے، لیکن کسی قسم کی زبردستی یا دباؤ قبول نہیں کرے گا۔ ملکی خودمختاری اور دفاع کے تحفظ کے لیے ایران اپنی صلاحیتوں پر انحصار جاری رکھے گا۔

ایرانی صدر نے توانائی کے مؤثر استعمال کی ضرورت پر بھی زور دیا۔ ان کا کہنا تھا کہ پٹرول، بجلی اور گیس کی بچت اور توانائی کے وسائل کے بہتر استعمال پر خصوصی توجہ دینے کی ضرورت ہے۔

ایرانی صدر کا یہ بیان ایک ایسے وقت میں سامنے آیا ہے جب تہران اور واشنگٹن کے درمیان کشیدگی کے خاتمے اور ممکنہ مذاکرات کے حوالے سے سفارتی کوششیں اہمیت اختیار کر رہی ہیں۔