خواہش تھی مولانا فضل الرحمان کے ساتھ اتحاد بنے، چیئرمین پی ٹی آئی بیرسٹر گوہر

اسلام آباد: چیئرمین پاکستان تحریک انصاف (پی ٹی آئی) بیرسٹر گوہر نے کہا ہے کہ ان کی خواہش تھی کہ مولانا فضل الرحمان کے ساتھ سیاسی اتحاد قائم ہو، تاہم دونوں جماعتوں کی جانب سے مشترکہ تحریک چلانے کا فیصلہ ابھی قبل ازوقت ہے۔

ایک بیان میں بیرسٹر گوہر کا کہنا تھا کہ مولانا فضل الرحمان اور پی ٹی آئی جوائنٹ اپوزیشن کا حصہ ہیں اور مولانا اس حوالے سے پی ٹی آئی کے ساتھ کھڑے ہیں۔

انہوں نے کہا کہ مولانا فضل الرحمان سے ملاقاتیں آل پارٹیز کانفرنس (اے پی سی) کے حوالے سے ہوئی تھیں اور ان کی خواہش تھی کہ دونوں جماعتوں کے درمیان باقاعدہ اتحاد قائم ہو۔

مولانا فضل الرحمان کے ساتھ مشترکہ تحریک پر کیا کہا؟

چیئرمین پی ٹی آئی نے واضح کیا کہ مولانا فضل الرحمان کے ساتھ مل کر تحریک چلانے کا معاملہ فی الحال قبل ازوقت ہے۔

ان کے مطابق سیاسی رابطے اور مشترکہ اپوزیشن کے معاملات اپنی جگہ موجود ہیں، تاہم مشترکہ تحریک کے حوالے سے ابھی کوئی حتمی فیصلہ نہیں کیا گیا۔

جیل میں ملاقاتوں سے متعلق عدالتی حکم خوش آئند ہے

بیرسٹر گوہر نے جیل میں ملاقاتوں سے متعلق اسلام آباد ہائیکورٹ کے حکم کا خیرمقدم کرتے ہوئے کہا کہ یہ فیصلہ خوش آئند ہے۔

انہوں نے امید ظاہر کی کہ اس مرتبہ عدالتی احکامات پر عمل درآمد یقینی بنایا جائے گا۔

بلدیاتی انتخابات میں بھرپور حصہ لیں گے: بیرسٹر گوہر

چیئرمین پی ٹی آئی نے بلدیاتی انتخابات کے حوالے سے واضح کیا کہ ان کی جماعت انتخابات کا بائیکاٹ نہیں کر رہی بلکہ ان میں بھرپور حصہ لے گی۔

ان کا کہنا تھا کہ پی ٹی آئی بلدیاتی انتخابات میں بھرپور انداز میں شرکت کرے گی۔