اسحاق ڈار کی ایرانی وزیر خارجہ عباس عراقچی سے ملاقات، امن و استحکام کیلئے مذاکرات پر زور

نیویارک: نائب وزیراعظم و وزیر خارجہ اسحاق ڈار کی ایرانی وزیر خارجہ عباس عراقچی سے ملاقات ہوئی، جس میں علاقائی امن و استحکام کے لیے مذاکرات اور سفارت کاری کی اہمیت پر زور دیا گیا۔

دفتر خارجہ کے مطابق دونوں وزرائے خارجہ کی ملاقات اقوام متحدہ کی جنرل اسمبلی کے اجلاس کے موقع پر ہوئی، جس میں پاکستان اور ایران کے دوطرفہ تعلقات سمیت علاقائی اور بین الاقوامی امور پر تفصیلی تبادلہ خیال کیا گیا۔

مذاکرات اور سفارت کاری پر زور

ملاقات کے دوران نائب وزیراعظم اسحاق ڈار نے علاقائی امن و استحکام کے فروغ کے لیے مذاکرات، سفارت کاری اور مسلسل رابطے کی اہمیت پر زور دیا۔

دفتر خارجہ کے مطابق دونوں جانب سے اس بات پر اتفاق کیا گیا کہ باہمی اور علاقائی معاملات پر مشاورت اور رابطے کا سلسلہ جاری رکھا جائے گا۔

ملاقات میں پاکستان اور ایران کے تعلقات کے علاوہ خطے کی مجموعی صورتحال اور باہمی دلچسپی کے دیگر علاقائی و عالمی معاملات بھی زیر بحث آئے۔

پاکستانی دفتر خارجہ کے مطابق دونوں ممالک نے قریبی رابطہ برقرار رکھنے پر اتفاق کیا۔