فلسطین پر پاکستان کے مؤقف میں کوئی تبدیلی نہیں آسکتی، اسحاق ڈار

( واشنگٹن ) نائب وزیر اعظم اور وزیر خارجہ اسحاق ڈار نے واضح کیا ہے کہ پاکستان فلسطین اور غزہ کے معاملے پر اپنے دیرینہ مؤقف پر قائم ہے اور آزاد فلسطینی ریاست کے قیام کے بغیر اسرائیل کے حوالے سے پاکستان کی پالیسی میں کوئی تبدیلی ممکن نہیں۔

واشنگٹن میں پاکستانی سفارتخانے میں امریکی وزیر خارجہ مارکو روبیو سے ملاقات کے بعد پریس کانفرنس کرتے ہوئے اسحاق ڈار نے کہا کہ انہوں نے اقوام متحدہ میں ہونے والی ملاقاتوں کے دوران بھی پاکستان کا یہی مؤقف دہرایا تھا۔

انہوں نے کہا کہ اسرائیل کو پہلے آزاد فلسطینی ریاست کے قیام کی جانب پیش رفت کرنا ہوگی، اس کے بعد ہی تعلقات معمول پر لانے سے متعلق کسی قسم کی بات ہوسکتی ہے

اسحاق ڈار نے کہا کہ امریکا نے ایران اور امریکا کے درمیان کشیدگی کم کرنے کے لیے پاکستان کی سفارتی کوششوں کو سراہا ہے۔ ان کے مطابق امریکی وزیر خارجہ مارکو روبیو نے بھی خطے میں امن و استحکام کے لیے پاکستان کے کردار کو اہم قرار دیا

انہوں نے بتایا کہ پاکستان اور امریکا نے تجارت، سرمایہ کاری، سیکیورٹی اور انسداد دہشت گردی سمیت مختلف شعبوں میں تعاون بڑھانے پر اتفاق کیا ہے۔ اسحاق ڈار نے یہ بھی انکشاف کیا کہ انہوں نے مارکو روبیو کو پاکستان کے دورے کی دعوت دی ہے اور امکان ہے کہ وہ رواں سال اسلام آباد کا دورہ کریں گے

وزیر خارجہ نے کہا کہ پاکستان مشرق وسطیٰ میں امن کے لیے ثالثی کا کردار ادا کر رہا ہے، اسی لیے وہ مذاکرات کی تفصیلات ظاہر نہیں کرسکتے۔ انہوں نے کہا کہ امریکا اور ایران دونوں پاکستان کی کوششوں کو قدر کی نگاہ سے دیکھ رہے ہیں۔

اسحاق ڈار کا کہنا تھا کہ قطر، عمان اور دیگر ممالک نے بھی مذاکرات کی میزبانی میں دلچسپی ظاہر کی تھی، تاہم تمام فریقین کے ساتھ قریبی اور دوستانہ تعلقات کی وجہ سے پاکستان کو اس عمل کے لیے اہم کردار دیا گیا

انہوں نے مزید کہا کہ پاکستان اور امریکا کے درمیان تعلقات کو مزید مضبوط اور اسٹریٹجک شراکت داری میں تبدیل کرنے پر بھی بات ہوئی ہے، جبکہ دونوں ممالک نے خطے میں امن، استحکام اور خوشحالی کے لیے مل کر کام جاری رکھنے کے عزم کا اظہار کیا۔