آزاد کشمیر کے کچھ بہکے ہوئے بھائی کسی ایجنڈے پر چل رہے ہیں، خواجہ آصف

(اسلام آباد) وزیر دفاع خواجہ آصف نے آزاد کشمیر میں جاری سیاسی صورتحال پر ردعمل دیتے ہوئے کہا ہے کہ آزاد کشمیر کے کچھ بہکے ہوئے بھائی کسی مخصوص ایجنڈے پر چل رہے ہیں اور انہیں آئین پاکستان کے تقاضوں کو مدنظر رکھنا چاہیے۔

سماجی رابطے کی ویب سائٹ ایکس پر اپنے بیان میں خواجہ آصف نے کہا کہ آزاد کشمیر کے بعض عناصر کو آئین کا مطالعہ کرنا چاہیے، کیونکہ آئین کا آرٹیکل 5 ہر شہری سے ریاست کے ساتھ غیر متزلزل وفاداری کا تقاضا کرتا ہے۔

وزیر دفاع نے اپنے پیغام میں مزید کہا کہ ریاست کے ساتھ وفاداری اور مکمل اطاعت ہی کسی بھی بات چیت اور سیاسی عمل کا نقطہ آغاز ہونا چاہیے۔ انہوں نے اس بات پر زور دیا کہ قومی مفاد اور ریاستی استحکام کو ہر حال میں مقدم رکھا جانا چاہیے۔

خواجہ آصف کے بیان کو آزاد کشمیر میں جاری سیاسی کشیدگی اور احتجاجی سرگرمیوں کے تناظر میں اہم قرار دیا جا رہا ہے۔ ان کا کہنا تھا کہ آئینی حدود کے اندر رہتے ہوئے ہی مسائل کا حل تلاش کیا جانا چاہیے تاکہ خطے میں امن اور استحکام برقرار رہے۔

سیاسی حلقوں کی جانب سے وزیر دفاع کے بیان پر مختلف ردعمل سامنے آ رہے ہیں جبکہ آزاد کشمیر کی موجودہ صورتحال پر بحث کا سلسلہ جاری ہے۔