اسپین میں دو تیز رفتار ٹرینوں کا خوفناک تصادم، 68 افراد ہلاک، درجنوں زخمی

میڈرڈ: اسپین کے صوبہ قرطبہ میں دو تیز رفتار ٹرینوں کے درمیان خوفناک تصادم کے نتیجے میں 68 افراد ہلاک اور درجنوں زخمی ہوگئے۔ حادثے کے بعد میڈرڈ سے جنوبی علاقے اندلس جانے والی ریلوے لائن پر ٹرینوں کی آمدورفت معطل کردی گئی، جبکہ وزیراعظم پیڈرو سانچیز نے اپنی سرکاری مصروفیات منسوخ کردیں۔

خبر رساں ادارے رائٹرز کے مطابق اسپین کے ریلوے آپریٹر ایڈیف نے بتایا کہ حادثہ میڈرڈ سے اندلس جانے والی ریلوے لائن پر صبح تقریباً 9 بجے پیش آیا، جہاں دو تیز رفتار ٹرینیں آپس میں ٹکرا گئیں۔ تصادم کے نتیجے میں اریو کمپنی کی ٹرین کی دو بوگیاں پٹڑی سے اتر گئیں۔

حکومتی ترجمان کے مطابق حادثے کی وجوہات اور زخمیوں کی حتمی تعداد کا تعین کیا جا رہا ہے۔ حکام نے بتایا کہ حادثے کے وقت دونوں ٹرینوں میں مجموعی طور پر 544 مسافر سوار تھے، جن میں سے 147 ایک ٹرین جبکہ 397 دوسری ٹرین میں موجود تھے۔

میڈرڈ اور اندلس کے درمیان ریلوے سروس معطل

حادثے کے بعد ریلوے آپریٹر ایڈیف نے سوشل میڈیا پلیٹ فارم ایکس پر جاری بیان میں تصدیق کی کہ میڈرڈ اور اندلس کے درمیان ریلوے لائن پر ٹرینوں کی آمدورفت معطل کردی گئی ہے۔

حادثے میں ملوث ٹرینیں رینفے اور اریو کمپنیوں کی تھیں۔ حکام نے جائے حادثہ پر امدادی سرگرمیاں شروع کردیں، جبکہ زخمیوں کو طبی امداد فراہم کرنے کے لیے متعلقہ ادارے متحرک ہوگئے۔

علاقائی ٹیلی وژن کی فوٹیج میں پٹڑی سے اتری ہوئی ٹرین کی ایک بوگی ریلوے ٹریک پر بلند مقام پر دکھائی دی، جبکہ ٹوٹی ہوئی دھاتی چادریں، مختلف پینل اور دیگر ملبہ نیچے ڈھلوان پر بکھرا ہوا تھا۔

دشوار گزار علاقے میں امدادی کارروائیاں

قریبی قصبے اُردا کے میئر مینوئل گالان نے ریڈیو کیڈینا ایس ای آر کو بتایا کہ امدادی اداروں نے مقامی انتظامیہ سے ہنگامی انتظامات کرنے کی درخواست کی تھی۔

ہسپانوی ریڈ کراس کے قومی ایمرجنسی ڈائریکٹر اِنیگو ویلا نے رائٹرز کو بتایا کہ حادثہ ایک پہاڑی علاقے میں پیش آیا، جہاں زیتون کے باغات واقع ہیں۔

ان کے مطابق جائے حادثہ تک پہنچنے کے لیے صرف ایک تنگ سڑک موجود ہونے کے باعث امدادی ٹیموں اور ایمبولینسوں کو رسائی میں مشکلات کا سامنا کرنا پڑا۔

وزیراعظم کی مصروفیات منسوخ، اپوزیشن کی انتخابی سرگرمیاں معطل

حادثے کے بعد اسپین کے وزیراعظم پیڈرو سانچیز نے اپنی تمام سرکاری مصروفیات منسوخ کردیں، جبکہ اپوزیشن جماعت پیپلز پارٹی نے بھی اپنی انتخابی سرگرمیاں ملتوی کرنے کا اعلان کیا۔

حکام کی جانب سے حادثے کی وجوہات جاننے کے لیے تحقیقات جاری ہیں۔ فی الحال تصادم کے اصل سبب کے بارے میں حتمی تفصیلات سامنے نہیں آئی ہیں۔