اسٹیو اسمتھ گردن کی انجری سے محفوظ، نیوزی لینڈ کے خلاف واپسی متوقع

سڈنی: آسٹریلیا کے تجربہ کار بیٹر اسٹیو اسمتھ کی گردن کی انجری سنگین ثابت نہیں ہوئی، جس کے بعد دسمبر میں نیوزی لینڈ کے خلاف ہوم ٹیسٹ سیریز کے پہلے میچ میں ان کی واپسی متوقع ہے۔

رپورٹس کے مطابق 37 سالہ اسٹیو اسمتھ کو جنوبی افریقا کے خلاف کیپ ٹاؤن میں تیسرے اور فیصلہ کن ٹیسٹ سے باہر کردیا گیا تھا۔ وہ کئی روز سے گردن میں درد محسوس کر رہے تھے۔

طبی معائنے اور اسکینز میں ان کی گردن کے سروائیکل فیسٹ جوائنٹ میں انجری کی تصدیق ہوئی۔ کرکٹ آسٹریلیا کے مطابق اسمتھ کا علاج اور بحالی جاری رہے گی، جبکہ نیوزی لینڈ کے خلاف آئندہ ہوم سیریز کے لیے ان کی دستیابی متوقع ہے۔

اسمتھ نے فیصلہ کن ٹیسٹ سے قبل نیٹ پریکٹس میں بیٹنگ بھی کی تھی، تاہم طبی جائزے کے بعد انہیں میچ کھیلنے کے لیے مکمل فٹ قرار نہیں دیا گیا۔ ان کی جگہ آل راؤنڈر کیمرون گرین نے چوتھے نمبر پر بیٹنگ کی۔

آسٹریلیا اور نیوزی لینڈ کے درمیان ٹیسٹ سیریز دسمبر میں شیڈول ہے، جس کا پہلا میچ 9 دسمبر کو پرتھ اسٹیڈیم میں شروع ہونا ہے۔ اسمتھ کی ٹیم میں واپسی کا انحصار بحالی کے عمل اور طبی پیش رفت پر ہوگا۔