میٹا کا ڈیجیٹل تحفظ سمٹ، ’ڈیجیٹل ڈائیلاگز ان ریئل لائف‘ متعارف

اسلام آباد: عالمی ٹیکنالوجی کمپنی میٹا نے حکومتی اداروں، تعلیمی ماہرین، والدین اور سول سوسائٹی کے اشتراک سے اسلام آباد میں ڈیجیٹل تحفظ سمٹ منعقد کیا، جس میں بچوں اور نوجوانوں کی آن لائن حفاظت، رازداری اور ڈیجیٹل فلاح و بہبود پر تبادلہ خیال کیا گیا۔

سمٹ میں میٹا نے ’ڈیجیٹل ڈائیلاگز ان ریئل لائف‘ کے نام سے ایک مفت آن لائن سہولت بھی متعارف کرائی، جس کا مقصد نوجوانوں، والدین اور اساتذہ کو آن لائن سرگرمیوں اور ممکنہ خطرات پر بہتر گفتگو کے مواقع فراہم کرنا ہے۔

تقریب میں شرکا نے اس بات پر زور دیا کہ بچوں کو انٹرنیٹ کے فوائد سے محروم کیے بغیر محفوظ ڈیجیٹل ماحول فراہم کرنا ضروری ہے۔ اس مقصد کے لیے مؤثر حفاظتی اقدامات، نجی معلومات کا تحفظ، عمر کے مطابق مواد کی فراہمی اور ڈیجیٹل خواندگی کے فروغ کو اہم قرار دیا گیا۔

وفاقی وزیر برائے آئی ٹی و ٹیلی کمیونیکیشن شزا فاطمہ خواجہ نے کہا کہ بچوں کا آن لائن تحفظ صرف والدین کی ذمہ داری نہیں، بلکہ ٹیکنالوجی کمپنیوں، حکومت، اساتذہ اور سول سوسائٹی کو مشترکہ طور پر کردار ادا کرنا ہوگا۔

وفاقی وزیر برائے انسانی حقوق سینیٹر اعظم نذیر تارڑ نے ڈیجیٹل دنیا میں انسانی وقار، بنیادی حقوق اور بالخصوص خواتین اور بچوں کے تحفظ کی اہمیت پر زور دیا۔

میٹا کے مطابق نئی سہولت میں پانچ تصویری کارڈز کے ذریعے سوشل میڈیا کے استعمال، مواد پر کنٹرول، آن لائن مہربانی اور ذاتی حدود جیسے موضوعات پر رہنمائی فراہم کی جائے گی۔ اس اقدام کا مقصد والدین اور نوجوانوں کو میٹا کے ٹین اکاؤنٹس میں موجود حفاظتی خصوصیات سے آگاہ کرنا بھی ہے۔

سمٹ میں شریک ماہرین نے مؤثر شکایتی نظام، محفوظ ڈیجیٹل پلیٹ فارمز اور شواہد پر مبنی پالیسیوں کی ضرورت پر زور دیتے ہوئے کہا کہ بچوں کو آن لائن خطرات سے نمٹنے کے لیے آگاہی اور اعتماد فراہم کرنا وقت کی اہم ضرورت ہے۔