واشنگٹن میں “معرکۂ حق” کی تاریخی فتح کے ایک سال مکمل ہونے پر پاکستانی سفارت خانے میں پروقار تقریب

(واشنگٹن ڈی سی -محمد نعیم اختر) تقریب میں پاکستانی کمیونٹی نے بھرپور شرکت کی اور “پاکستان ہمیشہ زندہ باد” کے فلک شگاف نعروں اور ملی نغموں کے ذریعے “بنیان مرصوص” کے جذبے کو تازہ کیا۔ شرکاء نے وطنِ عزیز کی سلامتی، خودمختاری اور قومی وقار کے تحفظ کے لیے ہر قربانی دینے کے عزم کا اعادہ کیا۔

تقریب کے دوران شرکاء نے افواجِ پاکستان کو زبردست خراجِ تحسین پیش کیا۔ بری، فضائی اور بحری افواج کی پیشہ ورانہ صلاحیتوں، قربانیوں اور حب الوطنی کو قومی سلامتی کیلئے ناقابلِ فراموش قرار دیا گیا۔

اس موقع پر صدرِ مملکت اور وزیر اعظم پاکستان کے خصوصی پیغامات پڑھ کر سنائے گئے جبکہ نائب وزیر اعظم و وزیر خارجہ اور وزیر دفاع کے ویڈیو پیغامات بھی نشر کیے گئے۔ بریگیڈیئر عرفان علی نے فیلڈ مارشل سید عاصم منیر کا خصوصی پیغام شرکاء تک پہنچایا۔

اپنے خطاب میں سفیر پاکستان رضوان سعید شیخ نے “معرکۂ حق” کی تاریخی اہمیت پر روشنی ڈالتے ہوئے کہا کہ پاکستانی افواج، سول و عسکری قیادت اور پوری قوم نے اس معرکے کے دوران پاکستان کی سالمیت، جغرافیائی اہمیت اور قومی وقار کو بھرپور انداز میں اجاگر کیا۔

انہوں نے کہا کہ محمد علی جناح کی دوراندیش قیادت نے پاکستان کے عالمی کردار کی پیش گوئی کی تھی، جو آج حقیقت بنتی دکھائی دے رہی ہے۔ ان کا کہنا تھا کہ پاکستان برصغیر کے مسلمانوں کی عزت و وقار کے تحفظ کیلئے قائم کیا گیا تھا اور قوم اپنی خودمختاری پر کبھی سمجھوتہ نہیں کرے گی۔

رضوان سعید شیخ نے کہا کہ امریکہ اور ایران کے درمیان کشیدگی میں امن کیلئے پاکستان کی سفارتی کوششیں اس کے مثبت عالمی کردار کی عکاس ہیں، جبکہ علاقائی استحکام کیلئے پاکستان کی خدمات ہمیشہ اہم رہی ہیں۔

انہوں نے دو ایٹمی طاقتوں کے درمیان جنگ بندی میں کردار ادا کرنے پر ڈونلڈ ٹرمپ کا بھی شکریہ ادا کیا۔

سفیر پاکستان نے کہا کہ حالیہ 88 گھنٹوں کے واقعات نے دنیا بھر میں پاکستانیت کے جذبے کو دوبارہ زندہ کر دیا ہے اور قومی اتحاد، معاشی استحکام اور ترقی ہی “بنیان مرصوص” کے فلسفے کی حقیقی تکمیل ہے۔