پیپلز پارٹی دھاندلی کے رونے رو رہی ہے، قیامت کتنے بجے ہے؟ مریم نواز کا بلاول پر طنز

لاہور: وزیراعلیٰ پنجاب مریم نواز شریف نے آزاد کشمیر کے انتخابات کے نتائج پر پاکستان پیپلز پارٹی کے اعتراضات کو تنقید کا نشانہ بناتے ہوئے کہا ہے کہ جو جماعت خود دھاندلی کی "باریک واردات" کی ماسٹر سمجھی جاتی ہے، وہ آج دھاندلی کا رونا رو رہی ہے۔

سماجی رابطے کی ویب سائٹ ایکس (سابقہ ٹوئٹر) پر جاری اپنے بیان میں مریم نواز شریف نے طنزیہ انداز میں سوال کیا، "قیامت کتنے بجے ہے؟"

وزیراعلیٰ پنجاب نے کہا کہ اگر پیپلز پارٹی کے پاس کارکردگی، بہتر طرزِ حکمرانی اور عوامی خدمت کا مؤثر ایجنڈا ہوتا تو وہ دوسروں پر الزامات لگانے کے بجائے اپنی کارکردگی پر توجہ دیتی۔

انہوں نے مزید کہا کہ سندھ میں 17 سال حکومت کرنے کے باوجود پیپلز پارٹی عوام کے سامنے اپنی نمایاں کامیابیاں پیش نہیں کر سکی، جبکہ آزاد کشمیر کے عوام نے ترقیاتی منصوبوں اور عوامی فلاحی اقدامات کو ووٹ دیا۔

مریم نواز کے مطابق گرین بس، اپنی چھت اپنا گھر، اپنا کھیت اپنا روزگار، کسان کارڈ، پکی سڑکوں اور بہتر امن و امان جیسے منصوبوں نے عوام کا اعتماد حاصل کیا۔

انہوں نے پیپلز پارٹی کو مشورہ دیا کہ انتخابی نتائج پر اعتراضات اٹھانے کے بجائے اپنی کارکردگی کا جائزہ لے۔ ایک اور بیان میں انہوں نے کہا کہ بلاول بھٹو زرداری آزاد کشمیر میں اپنی شکست تسلیم کریں اور سندھ کے عوام کی محرومیوں کے خاتمے پر توجہ دیں۔