مکہ دفاعی معاہدے کے رکن ممالک کی کمیٹی کا اجلاس آج ریاض میں ہوگا

ریاض: مکہ دفاعی معاہدے کے رکن ممالک کی کمیٹی کا اہم اجلاس آج سعودی دارالحکومت ریاض میں منعقد ہوگا، جس میں ترکیہ، سعودی عرب اور پاکستان کے نمائندے شرکت کریں گے۔

ذرائع کے مطابق اجلاس میں خطے کی مجموعی سکیورٹی صورتحال، باہمی دفاعی تعاون اور علاقائی امن و استحکام سے متعلق اہم امور پر تبادلہ خیال متوقع ہے۔

ریاض میں ہونے والا یہ اجلاس ایسے وقت میں ہو رہا ہے جب خطے میں سکیورٹی صورتحال ایک بار پھر توجہ کا مرکز بنی ہوئی ہے۔ یمنی صدر نے حوثی ملیشیا کے زیر قبضہ علاقوں کو واپس لینے کے لیے بڑے پیمانے پر فوجی کارروائی کا اعلان کیا ہے۔

یمنی صدر کے اعلان کے بعد خطے میں پیدا ہونے والی تازہ صورتحال کے تناظر میں ریاض اجلاس کو خصوصی اہمیت دی جا رہی ہے۔ اجلاس میں علاقائی سکیورٹی چیلنجز کے علاوہ رکن ممالک کے درمیان دفاعی رابطوں اور تعاون کو مزید مؤثر بنانے کے امور بھی زیر غور آنے کا امکان ہے۔

تجزیہ کاروں کے مطابق ترکیہ، سعودی عرب اور پاکستان کی اعلیٰ سطحی شرکت خطے میں بدلتی ہوئی سکیورٹی صورتحال کے حوالے سے باہمی مشاورت کی اہمیت کو ظاہر کرتی ہے۔