مودی کا امتحانی پرچے لیک کیس پر بڑا اعلان، فاسٹ ٹریک عدالتیں قائم کرنے کا فیصلہ

نئی دہلی: بھارتی وزیراعظم نریندر مودی نے ملک بھر میں امتحانی پرچے لیک ہونے کے معاملے پر جاری شدید احتجاج کے بعد ملوث افراد کو فوری سزا دینے کے لیے فاسٹ ٹریک عدالتیں قائم کرنے کا اعلان کر دیا۔

سماجی رابطے کی ویب سائٹ ایکس پر جاری اپنے بیان میں نریندر مودی نے کہا کہ نوجوانوں کی فلاح اور ان کا روشن مستقبل حکومت کی اولین ترجیح ہے۔ انہوں نے کہا کہ حکومت نے فیصلہ کیا ہے کہ امتحانی پرچے لیک کرنے میں ملوث افراد کے خلاف مقدمات کی تیز رفتار سماعت کے لیے خصوصی فاسٹ ٹریک عدالتیں قائم کی جائیں گی۔

مودی نے اپنے بیان میں کہا کہ جو عناصر نوجوانوں کے مستقبل سے کھیلنے کی کوشش کریں گے، انہیں فوری اور سخت سزا دی جائے گی اور کسی کو بھی قانون سے بالاتر نہیں سمجھا جائے گا۔

دوسری جانب نوجوانوں کی جماعت کاکروچ جنتا پارٹی (سی جے پی) نے وزیراعظم کے اعلان کو ناکافی قرار دیتے ہوئے احتجاج جاری رکھنے کا اعلان کیا ہے۔

سی جے پی کے ترجمان اشوتوش رانکا نے کہا کہ یہ خوش آئند بات ہے کہ ڈیڑھ ماہ تک جاری رہنے والے احتجاج کے بعد وزیراعظم نے بالآخر اس معاملے کا نوٹس لیا، تاہم اصل مسئلہ یہ ہے کہ امتحانی پرچے بار بار لیک کیوں ہو رہے ہیں۔

انہوں نے الزام عائد کیا کہ نظام میں موجود نااہلی اور مبینہ بدعنوانی کی وجہ سے یہ واقعات رونما ہو رہے ہیں۔ ان کے مطابق وزیر تعلیم سمیت ذمہ دار افراد کو جوابدہ بنایا جانا چاہیے۔

ترجمان نے واضح کیا کہ جب تک بھارتی وزیر تعلیم دھرمیندر پردھان اپنے عہدے سے استعفیٰ نہیں دیتے، طلبہ کا دھرنا اور احتجاج جاری رہے گا۔