چاند پر 2 فٹبال میدانوں جتنا بڑا نیا گڑھا دریافت

چاند کی سطح پر ایک بڑا نیا گڑھا سائنسدانوں کی توجہ کا مرکز بن گیا ہے، جس کی چوڑائی تقریباً 728 فٹ بتائی گئی ہے۔ یہ حجم تقریباً دو فٹبال میدانوں کے برابر بنتا ہے۔

غیر ملکی میڈیا رپورٹس کے مطابق ناسا کے سائنسدان رابرٹ ویگنر نے چاند کے نقشوں اور تصاویر کا معمول کے جائزے کے دوران ایک غیر معمولی روشن مقام دیکھا، جس کے گرد تاریک ہالہ موجود تھا۔

سائنسدانوں نے اس مقام کی مختلف اوقات میں حاصل کی گئی تصاویر کا موازنہ کیا، جس سے چاند کی سطح پر ایک نئی تبدیلی اور گڑھے کی تشکیل کے شواہد سامنے آئے۔

گڑھا کب بنا؟

رپورٹس کے مطابق یہ گڑھا 11 اپریل اور 22 مئی 2024 کے درمیان چاند کے مشرقی کنارے پر وجود میں آیا۔ اسے McGetchin کا نام دیا گیا ہے، جو ایک سائنسدان کے نام سے منسوب ہے۔

سائنسدانوں کا اندازہ ہے کہ اس حجم کا اثر چاند پر تقریباً ایک صدی یا اس سے بھی زیادہ عرصے میں ایک مرتبہ ہوسکتا ہے۔

ناسا کا قمری مشن

ناسا کا Lunar Reconnaissance Orbiter (LRO) 17 سال سے زائد عرصے سے چاند کے گرد گردش کر رہا ہے۔ اس مشن کے ذریعے چاند کی سطح، ساخت، درجہ حرارت، ٹپوگرافی اور تابکاری کے ماحول کا تفصیلی مطالعہ کیا جا رہا ہے۔

نئی دریافت اس بات کی ایک اور مثال ہے کہ چاند کی سطح پر ہونے والی تبدیلیوں کا مسلسل مشاہدہ کس طرح نئے سائنسی شواہد سامنے لا سکتا ہے۔