امریکی عوام نے واضح پیغام دے دیا، لوگ تقسیم نہیں: براک اوباما

واشنگٹن : سابق امریکی صدر اور ڈیموکریٹک پارٹی کے رہنما براک اوباما نے امریکی وسط مدتی انتخابات میں اپنی جماعت کی بڑی کامیابی پر ردعمل دیتے ہوئے کہا ہے کہ امریکی عوام نے واضح پیغام دے دیا ہے، وہ ملک میں تقسیم کی سیاست کے بجائے اتحاد اور مسائل کے عملی حل چاہتے ہیں۔

سماجی رابطے کی ویب سائٹ ایکس پر اپنے پیغام میں براک اوباما نے کہا کہ انتخابی نتائج ظاہر کرتے ہیں کہ امریکی شہری ایسے رہنماؤں کو پسند کرتے ہیں جو لوگوں کو تقسیم کرنے کے بجائے متحد کریں اور انہیں درپیش مسائل کے ٹھوس حل پیش کریں۔

امریکی عوام اتحاد کی سیاست چاہتے ہیں: اوباما

براک اوباما نے اپنے پیغام میں لکھا:

"آج رات امریکی عوام نے ایک واضح پیغام دیا ہے، وہ ایسی سیاست چاہتے ہیں جو لوگوں کو تقسیم کرنے کے بجائے متحد کرے اور ایسے رہنما چاہتے ہیں جو انہیں درپیش مسائل کے عملی حل پیش کریں۔"

انہوں نے کہا کہ ان انتخابی نتائج کے پیچھے مختلف علاقوں سے تعلق رکھنے والے قابل امیدواروں کی محنت شامل ہے، جنہوں نے ایسے انتخابی حلقوں سے بھی مقابلہ کیا جہاں ماضی میں ڈیموکریٹس کی کامیابی مشکل سمجھی جاتی تھی۔

اوباما کے مطابق کامیاب امیدواروں کا تعلق مختلف پس منظر اور سیاسی نظریات سے تھا، تاہم وہ عوامی خدمت اور اپنے حلقوں کے مفادات کو ترجیح دینے کے مشترکہ عزم پر متحد تھے۔

ڈیموکریٹ امیدواروں کی انتخابی مہم میں اوباما کا اہم کردار

سابق صدر براک اوباما نے انتخابات سے قبل مختلف اہم ریاستوں میں ڈیموکریٹ امیدواروں کی حمایت میں انتخابی مہم چلائی تھی۔

انہوں نے مشی گن اور جارجیا سمیت کئی اہم ریاستوں میں انتخابی جلسوں سے خطاب کیا اور ووٹرز کو ڈیموکریٹ امیدواروں کی حمایت کے لیے متحرک کیا۔

انتخابی مہم کے دوران انہوں نے صدر ڈونلڈ ٹرمپ کی پالیسیوں پر بھی تنقید کی اور عوامی مسائل کو انتخابی بحث کا مرکزی موضوع بنانے پر زور دیا۔

ان کے حمایت یافتہ متعدد امیدواروں نے بھی انتخابات میں کامیابی حاصل کی۔

اب ہماری ذمہ داری مزید بڑھ گئی ہے: سابق امریکی صدر

براک اوباما نے انتخابی کامیابی پر خوشی کا اظہار کرنے کے ساتھ ڈیموکریٹک پارٹی کو مستقبل کی ذمہ داریوں کی یاد دہانی بھی کرائی۔

انہوں نے کہا کہ اب وقت آگیا ہے کہ پارٹی کے رہنما عملی اقدامات کریں، جہاں انہیں اختیار حاصل ہے وہاں تبدیلیاں لائیں اور مستقبل کے لیے مضبوط بنیاد تیار کریں۔

اوباما نے اپنے پیغام میں مزید کہا:

"اب ہماری ذمہ داری ہے کہ ہم آستینیں چڑھائیں، جہاں ہمارے پاس اختیار ہے وہاں تبدیلیاں لائیں، مزید نقصان کو روکیں اور مستقبل کی بنیاد رکھیں۔"

انہوں نے انتخابات کے پرامن انعقاد میں کردار ادا کرنے والے ہزاروں انتخابی اہلکاروں اور رضاکاروں کا بھی شکریہ ادا کیا، جن کا تعلق دونوں بڑی سیاسی جماعتوں سے تھا۔