ایران جنگ میں کمی یا خاتمے کی امید، عالمی منڈی میں تیل کی قیمتوں میں مزید کمی

سنگاپور: ایران کے ساتھ جاری جنگ میں شدت کم ہونے اور ممکنہ خاتمے کی توقعات کے باعث عالمی منڈی میں خام تیل کی قیمتوں میں مزید کمی ریکارڈ کی گئی ہے۔ امریکی وسط مدتی انتخابات میں ریپبلکن پارٹی کی شکست کے بعد سرمایہ کاروں نے خطے میں کشیدگی کم ہونے کی امید ظاہر کی ہے۔

عالمی خبر رساں ادارے رائٹرز کے مطابق جمعرات کو ایشیائی تجارتی سرگرمیوں کے دوران برینٹ خام تیل کی قیمت 0.9 فیصد کمی کے بعد 93.82 ڈالر فی بیرل پر آ گئی، جبکہ امریکی ویسٹ ٹیکساس انٹرمیڈیٹ (WTI) خام تیل کی قیمت 1.36 فیصد گر کر 86.92 ڈالر فی بیرل ہو گئی۔

اس سے ایک روز قبل بدھ کو بھی عالمی منڈی میں تیل کی قیمتوں میں 8 فیصد سے زائد کی نمایاں کمی ریکارڈ کی گئی تھی۔ برینٹ خام تیل کی قیمت 8.67 فیصد کمی کے بعد 94.62 ڈالر جبکہ امریکی خام تیل 8.29 فیصد کمی کے بعد 88.12 ڈالر فی بیرل پر بند ہوا تھا۔

رپورٹس کے مطابق امریکی نائب صدر جے ڈی وینس نے اعتراف کیا تھا کہ ایران جنگ اور اس کے نتیجے میں ایندھن کی قیمتوں میں اضافے نے ریپبلکن پارٹی کی انتخابی شکست میں اہم کردار ادا کیا۔

سرمایہ کاروں کا خیال ہے کہ امریکی کانگریس میں ڈیموکریٹس کے کنٹرول کے بعد صدر ڈونلڈ ٹرمپ کی انتظامیہ پر ایران جنگ ختم کرنے کے لیے سیاسی دباؤ بڑھ سکتا ہے، جس سے خطے میں کشیدگی کم ہونے اور تیل کی سپلائی معمول پر آنے کے امکانات پیدا ہوئے ہیں۔

آبنائے ہرمز کی صورتحال بھی اہم

ماہرین کے مطابق ایران جنگ میں ممکنہ پیش رفت اور آبنائے ہرمز کے ذریعے تیل کی ترسیل میں بہتری عالمی منڈی میں قیمتوں پر اثر انداز ہو رہی ہے۔ آبنائے ہرمز عالمی تیل کی ترسیل کا ایک اہم سمندری راستہ ہے۔

تاہم تجزیہ کاروں نے خبردار کیا ہے کہ ایران اور امریکا کے درمیان مذاکرات اور جنگ کے خاتمے کے امکانات تاحال غیر یقینی ہیں، جبکہ کسی نئی فوجی کشیدگی کی صورت میں تیل کی قیمتیں دوبارہ بڑھ سکتی ہیں۔

رائٹرز کے مطابق جے پی مورگن نے بھی عالمی تیل کی منڈی میں سپلائی کے مقابلے میں اضافے کی نشاندہی کی ہے، تاہم خطے میں جغرافیائی سیاسی خطرات برقرار رہنے کے باعث قیمتوں میں اتار چڑھاؤ کا امکان موجود ہے۔