برازیل کو 2-1 سے شکست، ناروے پہلی بار فیفا ورلڈ کپ کے کوارٹر فائنل میں پہنچ گیا

نیو جرسی: فیفا ورلڈ کپ 2026 کے پری کوارٹر فائنل میں ناروے نے شاندار کارکردگی کا مظاہرہ کرتے ہوئے پانچ بار کی عالمی چیمپئن برازیل کو 2-1 سے شکست دے کر تاریخ رقم کر دی اور پہلی مرتبہ ورلڈ کپ کے کوارٹر فائنل میں جگہ بنا لی۔

میٹ لائف اسٹیڈیم میں کھیلے گئے سنسنی خیز مقابلے کے پہلے ہاف میں دونوں ٹیمیں کوئی گول نہ کر سکیں۔ اس دوران برازیل کو پنالٹی کی صورت میں میچ کا بہترین موقع ملا، تاہم ناروے کے گول کیپر اوریان نیلینڈ نے شاندار سیو کرتے ہوئے اپنی ٹیم کو خسارے سے بچا لیا۔

دوسرے ہاف میں ناروے نے منظم دفاع اور تیز رفتار جوابی حملوں کی حکمت عملی اپنائی، جس کا بھرپور فائدہ اسے میچ کے آخری لمحات میں ملا۔ ٹیم کے اسٹار اسٹرائیکر ارلنگ ہالینڈ نے 79ویں اور 89ویں منٹ میں دو شاندار گول کرکے برازیل کے دفاع کو چیرتے ہوئے ناروے کو 2-0 کی فیصلہ کن برتری دلا دی۔

برازیل نے اختتامی لمحات میں ایک گول کرکے واپسی کی کوشش کی، تاہم وہ شکست سے نہ بچ سکا اور یوں پانچ مرتبہ کی عالمی چیمپئن ٹیم ٹورنامنٹ سے قبل از وقت باہر ہوگئی۔

اس تاریخی فتح کے ساتھ ناروے نے پہلی بار فیفا ورلڈ کپ کے کوارٹر فائنل میں رسائی حاصل کر لی، جبکہ برازیل کی غیر متوقع شکست کو ٹورنامنٹ کے سب سے بڑے اپ سیٹس میں شمار کیا جا رہا ہے۔

ناروے کی اس کامیابی نے عالمی فٹبال میں اس کی بڑھتی ہوئی صلاحیتوں کا بھرپور اظہار کیا ہے، جبکہ ارلنگ ہالینڈ کی شاندار کارکردگی ایک بار پھر ٹیم کی کامیابی کا مرکز ثابت ہوئی۔