پاکستان اور کینیڈا کے طبی اداروں میں تعلیمی تعاون کا معاہدہ طے

اوٹاوا:کینیڈا میں پاکستانی ہائی کمیشن نے کالج آف فزیشنز اینڈ سرجنز پاکستان (CPSP) اور رائل کالج آف فزیشنز اینڈ سرجنز آف کینیڈا (RCPSC) کے وفود کی میزبانی کی، جہاں دونوں اداروں نے طبی تعلیم و تربیت میں تعاون کے لیے مفاہمت کی یادداشت (ایم او یو) پر دستخط کیے۔

اوٹاوا میں ہونے والی اس تقریب میں کالج آف فزیشنز اینڈ سرجنز پاکستان کے صدر پروفیسر ڈاکٹر خالد مسعود گوندل اور رائل کالج آف فزیشنز اینڈ سرجنز آف کینیڈا کے چیف ایگزیکٹو آفیسر ڈاکٹر کرسٹوفر واٹلنگ کی قیادت میں وفود نے شرکت کی۔

معاہدے کے تحت پوسٹ گریجویٹ طبی تعلیم، تربیت، استعداد کار میں اضافے اور باہمی دلچسپی کے شعبوں میں بہترین طریقہ ہائے کار کے تبادلے کے لیے تعاون کیا جائے گا۔

یہ پیش رفت پاکستان اور کینیڈا کے متعلقہ طبی اداروں کے درمیان پیشہ ورانہ تعاون کو فروغ دینے کی جانب ایک اہم قدم ہے۔