پاکستانی ڈراموں اور فلموں کو عالمی سطح پر فروغ دینے کا منصوبہ، نیٹ فلکس سے مذاکرات، اپنا OTT پلیٹ فارم بھی زیرِ غور

(اسلام آباد) حکومت پاکستان نے ملکی ڈراموں، فلموں اور دیگر تخلیقی مواد کو عالمی سطح پر متعارف کرانے کے لیے اہم اقدامات کا آغاز کر دیا ہے۔ اس مقصد کے تحت نیٹ فلکس، ایمیزون پرائم اور دیگر بین الاقوامی اسٹریمنگ پلیٹ فارمز کے ساتھ مذاکرات جاری ہیں تاکہ پاکستانی مواد کو عالمی ناظرین تک بہتر انداز میں پہنچانے کے لیے مساوی مواقع فراہم کیے جا سکیں۔

وفاقی وزیر منصوبہ بندی احسن اقبال نے سماجی رابطے کی ویب سائٹ ایکس پر جاری بیان میں کہا کہ پاکستانی ڈرامے اور فلمیں دنیا بھر میں مقبولیت حاصل کر رہے ہیں اور ان کی مانگ مسلسل بڑھ رہی ہے۔ ان کے مطابق پاکستانی فنکاروں، ہدایت کاروں اور پروڈیوسرز کی تخلیقات جنوبی ایشیا کے علاوہ مشرق وسطیٰ، یورپ، شمالی امریکا اور دیگر خطوں میں بھی ناظرین کی توجہ حاصل کر رہی ہیں۔

انہوں نے کہا کہ "اڑان پاکستان" برآمدی حکمت عملی کے تحت تخلیقی اور ثقافتی صنعت کو ملکی معیشت کا اہم ستون بنانے پر کام کیا جا رہا ہے۔ حکومت کے مطابق فلم، ڈرامہ اور ڈیجیٹل تفریحی مواد پاکستان کے لیے ایک اہم برآمدی شعبہ بن سکتا ہے، جس سے زرمبادلہ میں اضافہ اور عالمی سطح پر ملک کا مثبت تشخص اجاگر کرنے میں مدد ملے گی۔

بیان کے مطابق حکومت کا مؤقف ہے کہ نیٹ فلکس اور دیگر عالمی او ٹی ٹی پلیٹ فارمز دنیا بھر کے ناظرین تک رسائی کا مؤثر ذریعہ ہیں، تاہم ماضی میں مختلف علاقائی عوامل کے باعث پاکستانی مواد کو مطلوبہ نمائندگی نہیں مل سکی۔ اسی لیے ان پلیٹ فارمز کے ساتھ علاقائی فریم ورک میں بہتری کے لیے بھی بات چیت جاری ہے تاکہ پاکستانی پروڈکشنز کو زیادہ مواقع فراہم کیے جا سکیں۔

حکومت نے یہ بھی واضح کیا کہ صرف عالمی پلیٹ فارمز پر انحصار نہیں کیا جا رہا بلکہ پاکستان کا اپنا جدید اور آزاد او ٹی ٹی پلیٹ فارم قائم کرنے کی تیاری بھی جاری ہے۔ اس پلیٹ فارم کا مقصد پاکستانی کہانیوں، ثقافت، زبان اور فنکاروں کو عالمی سطح پر متعارف کرانا اور مقامی تخلیق کاروں کو براہِ راست بین الاقوامی مارکیٹ تک رسائی دینا ہے۔

حکومت کے مطابق اس اقدام سے فلم اور ڈرامہ انڈسٹری میں نئی سرمایہ کاری، روزگار کے مواقع اور عالمی کاروباری شراکت داری کو فروغ ملے گا، جبکہ تخلیقی صنعت کو ملکی برآمدات کے ایک مضبوط شعبے میں تبدیل کرنے میں بھی مدد حاصل ہوگی۔