غیر ملکی فوج ایرانی ساحل پر اتری تو علاقہ حملہ آوروں کے لیے جہنم بن جائے گا، ایرانی بحریہ

(تہران) ایرانی بحریہ کے ریئر ایڈمرل حبیب اللہ سیاری نے خبردار کیا ہے کہ اگر کوئی غیر ملکی فوج ایران کے ساحلی علاقوں میں داخل ہونے یا وہاں اترنے کی کوشش کرے گی تو پورا علاقہ حملہ آوروں کے لیے جہنم بن جائے گا۔

اپنے بیان میں ریئر ایڈمرل حبیب اللہ سیاری نے کہا کہ امریکا نے ایرانی سرزمین پر فوج اتارنے کا منصوبہ بنایا تھا، تاہم وہ اپنے اس منصوبے کو عملی جامہ پہنانے میں ناکام رہا۔

انہوں نے امریکی صدر ڈونلڈ ٹرمپ کے اس دعوے کو بھی مسترد کیا کہ ایران کی بحریہ تباہ ہو چکی ہے۔ ان کا کہنا تھا کہ ایرانی بحریہ مکمل طور پر فعال، منظم اور ملکی سرحدوں کے دفاع کے لیے ہر وقت تیار ہے۔

ایرانی بحریہ کے ریئر ایڈمرل نے مزید کہا کہ ایران اپنی سرزمین، ساحلی حدود اور قومی خودمختاری کے تحفظ کے لیے ہر ممکن اقدام کرے گا اور کسی بھی بیرونی جارحیت کا بھرپور جواب دیا جائے گا۔

ایرانی حکام کے اس بیان کو خطے میں جاری کشیدگی کے تناظر میں اہم قرار دیا جا رہا ہے، جہاں ایران اور امریکا کے درمیان حالیہ دنوں میں سخت بیانات اور الزامات کا تبادلہ جاری ہے۔